Մոլդովայի էլեկտրաէներգիայի սպառման ավելի քան 70%-ն ապահովվում է վերականգնվող աղբյուրներով. Moldpres
2 րոպեի ընթերցում
Հոդվածը հրապարակվում է «Արմենպրես»-ի և Moldpres-ի միջև ստորագրված համաձայնագրի շրջանակում։
Մոլդովայի էներգետիկայի նախարար Դորին Ջունգհիետուն հայտարարել է, որ երկրի ներքին էլեկտրաէներգիայի սպառման ավելի քան 70 տոկոսը ապահովվում է վերականգնվող էներգիայի աղբյուրներով։ «Արմենպրես»-ի փոխանցմամբ՝ այս մասին հայտնում է Moldpres-ը։
Նախարարն ընդգծել է, որ տվյալները ցույց են տալիս ներմուծումից ավելի ցածր կախվածություն և քաղաքացիների համար ավելի մեծ անվտանգություն։
Նրա խոսքով՝ Մոլդովան այժմ ապացուցում է, որ կարող է լինել էներգետիկ տեսանկյունից ավելի անկախ, քան երբևէ։
Նախարարը շեշտել է, որ ընդամենը հինգ տարվա ընթացքում վերականգնվող էներգիայի հզորությունը աճել է ավելի քան 12 անգամ՝ 77 ՄՎտ-ից մինչև ավելի քան 1 ԳՎտ։
«Սա տարածաշրջանում ամենաարագ էներգետիկ անցումներից մեկն է։ Մենք ներդրումներ ենք կատարում արևային վահանակների, քամու էներգիայի և ժամանակակից կուտակիչ համակարգերի մեջ, որպեսզի Մոլդովան կարողանա ունենալ ավելի անվտանգ և ուժեղ էներգետիկ համակարգ։ Քայլ առ քայլ մենք կառուցում ենք մի Մոլդովա, որը տանն ավելի շատ էներգիա է արտադրում», - շեշտել է Դորին Ջունգհիետուն։
Իշխանություններն այս ոլորտում մինչև 2030 թվականը սահմանում են ռազմավարական նպատակներ․ վերականգնվող աղբյուրներից ստացված էներգիայի առնվազն 27 տոկոսը համախառն վերջնական էներգիայի սպառման մեջ և վերականգնվող աղբյուրներից ստացված էլեկտրաէներգիայի առնվազն 31.2 տոկոսը համախառն վերջնական էլեկտրաէներգիայի սպառման մեջ։