Կառավարությունը նոր պատվովճարներ է սահմանել «Պաշտպան հայրենյաց» ծրագրով ԶՈՒ-ում ծառայություն անցնող զինծառայողների համար

Հայաստան կառավարությունը «Պաշտպան հայրենյաց» ծրագրով պայմանագրային ծառայություն անցնող զինծառայողների համար սահմանել է նոր պատվովճարներ։

«Արմենպրես»-ի հաղորդմամբ՝ Կառավարության նիստում նախագիծը ներկայացրել է պաշտպանության նախարարի տեղակալ Արման Սարգսյանը։

Նրա խոսքով՝ «Պաշտպան հայրենյաց» ծրագրով ծառայություն անցնող զինծառայողները, որոնց առաջին պայմանագրի ժամկետը լրացել է, նոր պայմանագիր կնքելու դեպքում կստանան պատվովճար։

«2 տարի ժամկետով պայմանագիր կնքելու դեպքում նախատեսվում է 1.5 միլիոն դրամի չափով պատվովճար, իսկ 5 տարի ժամկետով պայմանագիր կնքելու դեպքում՝ 5 միլիոն դրամի չափով»,- նշել է Սարգսյանը։

Նախագծով փոփոխվում է նաև ծրագրով պայմանագրային ծառայության անցնելու դիմում ներկայացնելու ժամկետը։

Փոխնախարարի խոսքով՝ եթե նախկինում դիմում կարող էին ներկայացնել պարտադիր զինվորական ծառայության 6 ամիսը լրացած զինծառայողները, ապա այժմ այդ հնարավորությունը կտրամադրվի արդեն ծառայության 4 ամիսը լրանալուց հետո։

Կառավարությունը որոշման նախագծին հավանություն է տվել։

Հիշեցնենք, որ «Պաշտպան հայրենյաց» ծրագրով զինված ուժերում ծառայող զինծառայողները պայմանագրով նախատեսված 5 տարի ժամկետով ծառայությունից և զորացրումից հետո ստանում են 5 միլիոն դրամ պատվովճար։ Նոր փոփոխությամբ, եթե նրանք որոշեն շարունակել ծառայությունը և նոր պայմանագիր կնքել Պաշտպանության նախարարության հետ, կստանան նոր պատվովճար։