2 րոպեի ընթերցում
Ուկրաինայի Բարձրագույն հակակոռուպցիոն դատարանը խափանման միջոց է ընտրել Կիևի արվարձանում շքեղ բնակարանների կառուցման ընթացքում փողերի լվացման գործով ևս չորս մեղադրյալների համար։ Այս գործով անցնում է նաև Ուկրաինայի նախագահ Վոլոդիմիր Զելենսկու գրասենյակի նախկին ղեկավար Անդրեյ Երմակը։ «Արմենպրես»-ի հաղորդմամբ՝ այս մասին հայտարարել է «Կոռուպցիային հակազդելու կենտրոն» ուկրաինական հասարակական կազմակերպությունը։
«Բարձրագույն հակակոռուպցիոն դատարանը խափանման միջոց է ընտրել «Դինաստիա» նախագծի շինարարության ընթացքում 460 միլիոն գրիվնա (10.4 միլիոն դոլար) լեգալացնելու ևս չորս կասկածյալների համար»,- նշված է կազմակերպության տարածած հաղորդագրությունում։
Կենտրոնի տվյալներով՝ այդ կասկածյալներն են «Սոլնեչնի Բերեգ» բնակարանային շինարարության կոոպերատիվի տնօրենը, ստվերային հաշվապահությանն առնչված կառավարիչը և կոոպերատիվի երկու պաշտոնական հիմնադիրները, որոնք իրականացրել են դրամական միջոցների օրինականացման ֆինանսական գործարքներ։ Դատարանը նրանց համար սահմանել է գրավ, որը պետք է վճարվի հինգ օրվա ընթացքում։
Ուկրաինայի հակակոռուպցիոն մասնագիտացված դատախազությունը մայիսի 11-ին հայտարարել էր Կիևի արվարձանում շքեղ բնակարանների կառուցման ընթացքում փողերի լվացման համար Երմակին մեղադրանք առաջադրելու մասին։ Դրանից երեք օր անց Երմակի նկատմամբ որպես խափանման միջոց էր ընտրվել կալանքը՝ 3.1 միլիոն դոլար գրավ վճարելու հնարավորությամբ: Երմակը հայտարարել էր, որ չունի նման միջոցներ և իր պաշտպանությունը կբողոքարկի այս որոշումը: