Զելենսկին հայելային պատասխան է խոստացել Մոսկվայի հարվածներին՝ հայտարարված հրադադարին ընդառաջ

Մայիսի 8-9-ը Ռուսաստանի կողմից հայտարարված հրադադարի նախաշեմին Ուկրաինայի նախագահ Վոլոդիմիր Զելենսկին կրկին հայտարարել է, որ ուկրաինացի զինվորականները մտադիր են գործել հայելային ձևով։ «Արմենպրես»-ի փոխանցմամբ՝ այս մասին նա գրել է իր Telegram ալիքում։

Զելենսկու խոսքով՝ միայն մայիսի 7-ին Ռուսաստանը մոտ 100 հարձակողական անօդաչու թռչող սարք է արձակել Ուկրաինայի ուղղությամբ և տասնյակ ավիահարվածներ է հասցրել, ինչը «ցույց է տալիս, որ Ռուսաստանը լրջորեն չի քննարկում հրադադարը»։

«Միակ բանը, որը շարունակում է անհանգստացնել Ռուսաստանի ղեկավարությանը, Կարմիր հրապարակում կարճատև լռությունն է», - շեշտել է Զելենսկին։

«Ուկրաինան կգործի արդարացիորեն։ Մենք առաջարկել ենք հրադադար մայիսի 6-ի կեսգիշերից։ Երեկ և այսօր Ռուսաստանը խախտում է այս ռեժիմը։ Ռուսական հարվածներին ի պատասխան՝ մենք կկիրառենք մեր հեռահար պատժիչ միջոցները, իսկ Ռուսաստանի դիվանագիտական ​​​​գործունեության պատրաստակամությանն ի պատասխան՝ կշարունակենք դիվանագիտությունը», - հավելել է նա։

Իր մեկ այլ գրառման մեջ Զելենսկին նշել է, որ Ուկրաինայի «հեռահար պատժամիջոցները» կիրառվել են մայիսի 7-ին, մասնավորապես՝ սահմանից 1500 կմ հեռավորության վրա՝ Պերմում, որտեղ տեղական իշխանությունները հայտնել են արդյունաբերական օբյեկտին անօդաչու թռչող սարքի հարվածի մասին։

Միևնույն ժամանակ, փոխադարձ հարվածները շարունակվում են։ Ուկրաինայի իշխանությունները հայտնել են, որ ռուսական հարվածների հետևանքով Խարկովում վիրավորների թիվը հասել է յոթի, իսկ Սումիի մարզում հրետակոծության հետևանքով կին է զոհվել։ Դնեպրոպետրովսկի մարզում մայիսի 7-ի գիշերը տեղի ունեցած հարձակման հետևանքով չորս մարդ է վիրավորվել։

Ռուսական իշխանություններն իրենց հերթին հայտնել են, որ Բելգորոդի մարզում անօդաչու թռչող սարքի հարձակման հետևանքով մեկ մարդ զոհվել է, երկուսը՝ վիրավորվել։ Անօդաչու թռչող սարքերի հարվածների հետևանքով Պերմում արդյունաբերական ձեռնարկություններից մեկը հարված է ստացել։

Իշխանությունները նաև տեղեկացրել են, որ Բրյանսկի Բեժիցկի շրջանում տեղի ունեցած հարձակման հետևանքով վիրավորվել է 13 մարդ, այդ թվում՝ մեկ երեխա։