Փաշինյանը կարևորել է ընտրական գործընթացների վրա ապօրինի ազդեցությունները բացառելուն ուղղված զգոնությունը չթուլացնելը
1 րոպեի ընթերցում
Առաջիկա խորհրդարանական ընտրություններում ամենամեծ առաջնահերթությունները կլինեն դրանք միջազգային ստանդարտներին համապատասխան անցկացնելը՝ ապահովելու ՀՀ քաղաքացիների ազատ կամարտահայտությունը և բացառելու ընտրողների կամքի վրա ապօրինի ազդեցությունները։
«Արմենպրես»-ի հաղորդմամբ՝ այս մասին ՀՀ կառավարության մայիսի 7-ի հերթական նիստում հայտարարել է վարչապետ Նիկոլ Փաշինյանը՝ անդրադառնալով մայիսի 8-ից մեկնարկող քարոզարշավի և խորհրդարանական ընտրությունների թեմային։
«Իհարկե, մինչ այս պահը մեր իրավապահներն ահռելի աշխատանք են իրականացրել, բայց նաև պետք է զգոնությունը չթուլացնել, որպեսզի բացառվի ընտրակաշառքների և այլ ապօրինի միջոցների ազդեցությունն ընտրությունների արդյունքների վրա»,-ընդգծել է Փաշինյանը՝ կարևորելով նաև քարոզարշավի ընթացքի օրինականության ապահովման ուղղությամբ իրավապահների ուշադրությունը։
Ըստ վարչապետի՝ առկա են բոլոր նախադրյալները ընտրությունները պատշաճ մակարդակով և ժողովրդավարության բոլոր կանոններին ու ստանդարտներին համապատասխան անցկացնելու համար՝ ապահովվելով ՀՀ բոլոր քաղաքացիների ազատ կամքի արտահայտումն ու արձանագրումը, ինչպես նաև մտքերի, գաղափարների, ծրագրերի մրցակցությունը։