1 րոպեի ընթերցում
Կոլումբիայում Պանամերիկյան մայրուղու վրա տեղի ունեցած ահաբեկչական հարձակման հետևանքով 14 մարդ է զոհվել։ «Արմենպրես»-ի հաղորդմամբ` այս մասին հայտնում է BBC-ն։
Պայթյունը տեղի է ունեցել Կոլումբիայի հարավ-արևմուտքում գտնվող Կաուկա դեպարտամենտում. ռումբը պայթել է մայրուղով ավտոբուսի անցնելու պահին։ 14 զոհվածներից բացի, վիրավորվել է առնվազն 38 մարդ։
Կոլումբիայի նախագահ Գուստավո Պետրոն հարձակման մեջ մեղադրել է ձախակողմյան Խայմե Մարտինես խմբավորման ապստամբներին։
Խայմե Մարտինեսը ծայրահեղ ձախակողմյան FARC-ի նախկին մարտիկներից կազմված խումբ է, որը ավելի քան 50 տարի զինված պայքար է մղել կառավարության դեմ։ 2016 թվականին FARC-ը համաձայնել է զինաթափվել և վերածվել օրինական քաղաքական շարժման, սակայն որոշ անդամներ հրաժարվել են զենքը վայր դնել և շարունակել են գործել նոր, ավելի փոքր խմբերով։
Կոլումբիայում նախագահական ընտրությունները կկայանան մայիսի 31-ին։ Այս ֆոնին արմատական խմբավորումները զգալիորեն ավելացրել են հարձակումները։