2 րոպեի ընթերցում
ԵՄ դիվանագիտության ղեկավար Կայա Կալասը հայտարարել է, որ ապրիլի 22-ին առաջընթաց է ակնկալում Ուկրաինային 90 միլիարդ եվրո վարկի հատկացման հարցում։ Այդ մասին «Արմենպրես»-ը տեղեկանում է «Ինտերֆաքս» գործակալությունից:
«Մենք չորեքշաբթի օրը դրական որոշումներ ենք ակնկալում Ուկրաինային տրամադրվող վարկի վերաբերյալ։ Ուկրաինան դրա կարիքն ունի», - ասել է Կալասը լրագրողներին ԵՄ արտգործնախարարների՝ Լյուքսեմբուրգում կայանալիք հանդիպմանը ժամանելուց հետո։
Եվրոպական լրատվամիջոցներն իրենց հերթին պարզաբանում են, որ ապրիլի 22-ին կկայանա ԵՄ անդամ երկրների մշտական ներկայացուցիչների նիստը, որտեղ կարող է քննարկվել վարկի հարցը։
Ավելի վաղ Ուկրաինայի համար նախատեսված 90 միլիարդ եվրո ԵՄ վարկն ամիսներով սառեցվել էր Ուկրաինայի նախագահ Վոլոդիմիր Զելենսկու և Հունգարիայի վարչապետ Վիկտոր Օրբանի միջև «Դրուժբա» նավթատարի շուրջ վեճի պատճառով։ Օրբանը պնդում էր, որ Կիևը քաղաքական դրդապատճառներով չի վերանորոգում խողովակաշարը, որով Ուկրաինայի տարածքով ռուսական նավթ է տեղափոխվում եվրոպական երկրներ։
Սակայն ապրիլի 12-ին Օրբանի կուսակցությունը պարտություն է կրել Հունգարիայի խորհրդարանական ընտրություններում։ Հաղթանակած «Տիսա» կուսակցության առաջնորդ Պետեր Մադյարը հայտարարել է, որ Բուդապեշտը ԵՄ մյուս երկրների հետ կքննարկի Ուկրաինային վարկ հատկացնելու հարցը։