Հյուսիս-հարավ մայրուղու կառուցմամբ մեր երկրի տարանցիկ ներուժը կկարողանանք օգտագործել առավելագույն չափով․ Եղիազար Վարդանյան
1 րոպեի ընթերցում
Հյուսիս-հարավ մայրուղու դերը Հայաստանի տնտեսական զարգացման համար անգնահատելի է։
«Արմենպրես»-ի հետ զրույցում այդ կարծիքը հայտնեց Քաղաքաշինության կոմիտեի նախագահ Եղիազար Վարդանյանը՝ անդրադառնալով Հյուսիս-հարավ մայրուղու նշանակությանը։
«Լոգիստիկ հնարավորությունները, որոնք կընձեռի Հյուսիս-հարավ մայրուղին, կունենան դրական մեծ ազդեցություն։ Մայրուղին կնպաստի մեր տարածքների բազմակենտրոն զարգացմանը։ Կունենանք հնարավորություն մեծ ու մատչելի հասանելիություն ապահովել Երևանից հեռու բնակավայրերի և մայրաքաղաքի միջև։ Մեծ տնտեսական էֆեկտ կունենանք նաև բեռնափոխադրումների առումով։ Այսօր օգտագործում ենք Հայաստանի տարանցիկ ներուժի փոքր մասը միայն, մինչդեռ Հյուսիս-հարավի կառուցմամբ մեր երկրի տարանցիկ ներուժը կկարողանանք օգտագործել առավելագույն չափով՝ ինչը կնպաստի և՛ քաղաքացիների, և՛ պետության բարեկեցության աճին ու զարգացմանը»,- ասաց Վարդանյանը։