2 րոպեի ընթերցում
Հայաստանի վարչապետ Նիկոլ Փաշինյանն ու Ռուսաստանի նախագահ Վլադիմիր Պուտինն ապրիլի 1-ին Մոսկվայում կայացած հանդիպման ժամանակ պայմանավորվել են ևս մեկ հանդիպում անցկացնել հունիսի երկրորդ կեսին։
«Արմենպրես»-ի փոխանցմամբ՝ վարչապետ Նիկոլ Փաշինյանն այդ մասին հայտնեց լրագրողների հետ ճեպազրույցի ժամանակ։
«Ես, ինչպես ասել եմ, այդ այցը շատ հաջող եմ գնահատում։ Ինչ վերաբերում է դեմ առ դեմ հանդիպմանը, մենք արդեն պայմանավորվել ենք մեր առաջիկա հանդիպումների և միջոցառումների մասին։ Բարձր մակարդակով հանդիպման մասին ենք պայմանավորվել հունիսի 2-րդ կեսին»,- ասաց վարչապետը։
Վարչապետն ընդգծեց, որ Հայաստանի և Ռուսաստանի հարաբերությունները գտնվում են կառուցողական տրանսֆորմացիայի փուլում:
«Ես այդ պրոցեսը գնահատում եմ դրական և մենք մեր սկզբունքը շարունակաբար պահելու ենք: Մենք բարեկամական երկխոսության տրամաբանությունից դուրս չենք գալու և շարունակելու ենք այդ ճանապարհով»,- ասաց վարչապետը:
Նիկոլ Փաշինյանն անդրադարձավ նաև Եվրասիական տնտեսական միությունը և Եվրոպական միությունը համատեղելու վերաբերյալ դիտարկումներին:
«Քանի դեռ կա հնարավորություն համատեղելու այն քաղաքականությունները, որ վարում ենք ԵԱՏՄ և ԵՄ ուղղությամբ, մենք այդ քաղաքականությունները կհամատեղենք: Երբ կգա անհամատեղելիության պահը, ժողովրդի հետ որոշումներ կկայացնենք»,- նշեց վարչապետը:
Հայաստանի վարչապետը հավելեց՝ Ռուսաստանի նախագահ Վլադիմիր Պուտինի հետ պայմանավորվել են բարձր մակարդակով հանդիպում անցկացնել հունիսի 2-րդ կեսին: