Իմ տպավորությամբ փոքր և միջին բիզնեսի միջին հարկային ծանրաբեռնվածությունը բարձր չէ․ վարչապետ

Փոքր և միջին բիզնեսի համար հարկային բեռը գործող կարգավորումների շրջանակում բարձր չէ, և հիմնական խնդիրն ավելի շատ առևտրի ծավալների մեջ է։

«Արմենպրես»-ի փոխանցմամբ՝ վարչապետի՝ Երևանում քաղաքացիների հետ շփման ընթացքում վարագույրների վաճառքով զբաղվող փոքր բիզնեսի ներկայացուցիչը բողոքել է, որ հարկերը բարձր են, իսկ առևտուրը՝ քիչ։

Վարչապետը պատասխանեց, որ իր տպավորությամբ փոքր և միջին բիզնեսի միջին հարկային ծանրաբեռնվածությունը բարձր չէ, եթե օգտվում են օրենքով նախատեսված հնարավորություններից։

«Իմ տպավորությամբ այդքան էլ շատ չէ, եթե դուք օրենքի տված հնարավորություններից օգտվում եք»,- նշեց Փաշինյանը՝ ընդգծելով, որ ծախսերի հաշվառման միջոցով հարկային բեռը կարող է նվազեցվել։

Էկոնոմիկայի նախարար Գևորգ Պապոյանն էլ հավելեց, որ բիզնեսի ծախսերը՝ ներառյալ վարձակալությունը և կոմունալ վճարները, կարող են ներառվել հաշվարկներում և նվազեցնել հարկային պարտավորությունները։

Քաղաքացին, սակայն, պնդեց, որ նույնիսկ այդ պարագայում հարկային բեռը մեծ է՝ հաշվի առնելով ցածր առևտրաշրջանառությունը և բարձր ծախսերը։

Փաշինյանը պարզաբանեց, որ հարկը հաշվարկվում է շրջանառությունից և համեմատաբար փոքր մասն է կազմում ընդհանուր եկամուտների մեջ։

«100 հազար դրամի առևտուր եք արել և 1500 դրամ պետք է վճարեք, դա շա՞տ է»,- ասաց նա։

Վարչապետը նշեց նաև, որ բիզնեսի շահութաբերությունը պետք է դիտարկել ընդհանուր եկամուտների համատեքստում՝ ընդգծելով, որ նման մակարդակի շահույթը միջազգային չափանիշներով համարվում է գերազանց։

«Աշխարհում 20 տոկոսանոց շահույթ տվող բիզնեսը համարվում է հոյակապ բիզնես»,- ասաց Փաշինյանը։

Միաժամանակ Փաշինյանը համաձայնեց, որ առևտրի ցածր ծավալները խնդիր են և նշեց, որ Կառավարությունը պետք է մտածի այդ ուղղությամբ քայլերի մասին։

«Կմտածենք ինչ անենք, որ ձեր առևտուրը շատանա»,- նշեց վարչապետը։

Նա հավելեց, որ հարկերից ձևավորվող պետական եկամուտները ուղղվում են սոցիալական և հանրային ծառայությունների ապահովմանը՝ ընդգծելով, որ 2017 թվականից ի վեր պետական բյուջեի եկամուտները աճել են 135 տոկոսով։