2 րոպեի ընթերցում
Իրանի «Բուշեր» ատոմակայանին հարվածները շարունակելը մեծ սպառնալիք կդառնա անվտանգության համար. համապատասխան ազդակները փոխանցվում են ամերիկյան կողմին: Ինչպես «Արմենպրես»-ը տեղեկանում է «Ինտերֆաքս» գործակալությունից, այս մասին հայտարարել է ՌԴ նախագահի մամուլի քարտուղար Դմիտրի Պեսկովը։
«Դուք գիտեք, որ «Ռոսատոմ»-ի ղեկավար Լիխաչովն արդեն բազմիցս շատ մտահոգիչ հայտարարություններ է արել այն հարվածների կապակցությամբ, որոնք արդեն հասցվել են։ Եվ, իհարկե, դա իրենից շատ մեծ սպառնալիք է ներկայացնում անվտանգության համար, եթե այս միտումը շարունակվի։ Իհարկե, համապատասխան ազդակները փոխանցվում են ամերիկյան կողմին։ Մենք միջուկային օբյեկտներին հարվածները համարում ենք պոտենցիալ առումով չափազանց վտանգավոր և նույնիսկ հղի հնարավոր անդառնալի հետևանքներով», - ասել է նա։
Կրեմլի խոսնակն ընդգծել է, որ ռուսական կողմն, «այս հարցում չափազանց պատասխանատու դիրք գրավելով, բազմիցս հայտարարել է իր մտահոգությունների մասին»։
Պեսկովը հիշեցրել է, որ «Բուշեր» ատոմակայանը գտնվում է ՄԱԿ-ի և Ատոմային էներգիայի միջազգային գործակալության հսկողության ներքո։
«Ռուսաստանը մշտական երկխոսության մեջ է ԱԷՄԳ-ի հետ», - ասել է Պեսկովը։