2 րոպեի ընթերցում
Հայաստանի Հանրապետությունում Միացյալ Նահանգների գործերի ժամանակավոր հավատարմատար Դեյվիդ Ալենն առաջին անգամ այցելել է Գյումրի՝ ծանոթանալու քաղաքին և շփվելու համայնքի հետ։
«Արմենպրես»-ի հաղորդմամբ՝ այս մասին «Ֆեյսբուք»-ում համապատասխան տեսանյութ է տարածել ՀՀ-ում ԱՄՆ դեսպանությունը՝ նշելով, որ այցը հագեցած է եղել կարևոր հանդիպումներով։
«Առաջին կանգառը ՆԳՆ ոստիկանության Պարեկային ծառայության Շիրակի մարզի գումարտակն էր, որի ընթացքում Դեյվիդ Ալենն ընդգծեց ԱՄՆ-ի աջակցությունը Հայաստանի իրավապահ համակարգի բարեփոխումներին և ավելի անվտանգ համայնքներ ձևավորելու ընդհանուր նպատակին։
Հաջորդիվ նա այցելեց ԹՈՒՄՕ և ծանոթացավ երիտասարդների զարգացմանը միտված ծրագրերին ու նախաձեռնություններին։ Տեղի ունեցավ նաև ջերմ հանդիպում ԱՄՆ կառավարության կրթական փոխանակման ծրագրերի շրջանավարտների հետ, ովքեր ծրագրի ընթացում ձեռք բերած իրենց գիտելիքներն ու փորձը շարունակաբար կիրառում են համայնքի զարգացման նպատակով»,-նշել է ԱՄՆ դեսպանությունը։
Հաղորդվում է, որ այցելության ավարտին տեղի է ունեցել «Հիմնադիրների թանգարան» ցուցադրության բացումը։
«Գյումրու «Ամերիկյան անկյունում» կազմակերպված այս միջոցառումը Միացյալ Նահանգների 250-ամյակին նվիրված «Ազատություն-250» հոբելյանական միջոցառումներից է, որը գյումրեցիներին ներկայացնում է Միացյալ Նահանգների ակունքները, առաջնորդությունը, քաղաքացիական ներգրավվածությունն ու ազատության անսասան արժեքները»,-ասված է դեսպանության տարածած հաղորդագրության մեջ։