Արաղչին արձագանքել է Իրանի դեմ պատերազմի համար 200 միլիարդ դոլարի պահանջի մասին հրապարակումներին
1 րոպեի ընթերցում
Իրանի արտաքին գործերի նախարար Աբբաս Արաղչին արձագանքել է Իրանի դեմ պատերազմի հետագա ֆինանսավորման համար Պենտագոնի կողմից ավելի քան 200 միլիարդ դոլարի բյուջետային պահանջի մասին հրապարակումներին: «Արմենպրես»-ի փոխանցմամբ՝ այս թեմային Արաղչին անդրադարձել է X-ում գրառմամբ։
«Մենք ընդամենը երեք շաբաթ է՝ այս ընտրովի պատերազմի մեջ ենք, որը պարտադրվել է թե՛ իրանցիներին, թե՛ ամերիկացիներին։ Այս 200 միլիարդ դոլարը սառցաբեկորի գագաթն է։ Հասարակ ամերիկացիները կարող են շնորհակալություն հայտնել Բենիամին Նեթանյահուին և Կոնգրեսում նրա սպասավորներին տրիլիոն դոլարանոց «Իսրայելն առաջնահերթ է» հարկի համար, որը շուտով կհարվածի ԱՄՆ տնտեսությանը», - նշվում է գրառման մեջ։
Washington Post-ը, հղում անելով վարչակազմի բարձրաստիճան աղբյուրի, գրել էր, որ այս գումարը զգալիորեն գերազանցում է ռազմական արշավի համար ծախսերի՝ ավելի վաղ հրապարակված թվերը։
ԱՄՆ պաշտպանության նախարարությունը և Սպիտակ տունը հրաժարվել են թերթին մեկնաբանություններ տալ այս առնչությամբ։