ԶՊՄԿ-ն ձևավորել է Կայուն զարգացման, ԲՍԿ և ռիսկերի հանձնաժողով

ԶՊՄԿ ընկերության Տնօրենների խորհրդի շրջանակում (կազմում) ձևավորվել է Կայուն զարգացման, ԲՍԿ և ռիսկերի հանձնաժողով: «Արմենպրես»-ի փոխանցմամբ՝ Ընկերությունից հայտնում են, որ Տնօրենների խորհրդի կողմից Կայուն զարգացման, ԲՍԿ և ռիսկերի հանձնաժողովի նախագահ է ընտրվել խորհրդի անդամ Արտյոմ Պետրոսյանը:

«Այս հանձնաժողովի ստեղծումը կարևորագույն քայլ էր կորպորատիվ կառավարման միջազգային ճափանիշների ներդրման  ուղղությամբ։ Պետք է նշեմ, որ նման հանձնաժողով ստեղծելու նախաձեռնությամբ հանդես եկավ նաև ՀՀ պետական գույքի կառավարման կոմիտեն՝ որպես պետությանը պատկանող բաժնետոմսերը կառավարող մարմին, ինչն, իմ կարծիքով, ընդգծում է ժամանակակից կորպորատիվ կառավարման չափանիշների նկատմամբ մեր պետության մոտեցումը: Այսպիսով, բաժնետիրոջ նախաձեռնությունը և ընկերության ներսում արդեն ձևավորված նման հանձնաժողով ստեղծելու ըմբռնումը համադրվեցին՝ տալով իրենց գործնական արդյունքը»,- նշեց հանձնաժողովի նորընտիր նախագահը։

Հանձնաժողովն իրականացնելու է ԶՊՄԿ ռիսկերի կառավարման շրջանակի, կայուն զարգացման ռազմավարության, բնապահպանական, սոցիալական և կորպորատիվ կառավարման (ESG) կատարողականի ռազմավարական վերահսկողություն: Հանձնաժողովը զբաղվելու է ESG համապատասխան վարկանիշների ուսումնասիրմամբ, ընտրությամբ և ներդրման օժանդակությամբ, ուսումնասիրելու է կորպորատիվ կառավարման միջազգային լավագույն փորձը և աջակցելու է դրանց ներդրմանը ու կիրառմանն Ընկերությունում:

Արտյոմ Պետրոսյանն ընդգծեց՝ այսօր ընկերությունների հաջողությունը չափվում է ոչ միայն ֆինանսական արդյունքներով, այլ նաև այն ազդեցությամբ, որը նրանք ունենում են շրջակա միջավայրի, իրենց աշխատակիցների և հասարակության վրա։

«Ցավոք, Հայաստանում շատ հաճախ են հանդիպում մոտեցումներ, երբ շահույթը դիտարկվում է որպես բիզնեսի հաջողության միակ չափանիշ։ Սակայն ժամանակակից տնտեսությունը ընկերություններին այլ կերպ է գնահատում. կարևոր է ոչ միայն այն, թե որքան է կազմում ընկերության շահույթը, այլ նաև՝ ինչպիսի կառավարման համակարգ է այն ձևավորել, արդյոք պահպանվում են ստանդարտները, ինչպես են կառավարվում ռիսկերը և որքան պատասխանատու է ընկերությունը հասարակության նկատմամբ։ Այս իմաստով ESG-ն ոչ թե նորաձևություն է, այլ բիզնեսի հասունության և կորպորատիվ կառավարման որակի կարևոր ցուցանիշ, և հենց այս նպատակով էլ ԶՊՄԿ-ում ստեղծվել է «Կայուն զարգացման, ԲՍԿ և ռիսկերի» հանձնաժողովը, որի հիմնական առաքելությունն է ապահովել այդ սկզբունքների համակարգված և արդյունավետ իրականացումը ընկերությունում»,– մանրամասնեց Պետրոսյանը։

ԶՊՄԿ-ի՝ Կայուն զարգացման, ԲՍԿ և ռիսկերի հանձնաժողովի նախագահի կարծիքով ESG և կորպորատիվ կառավարման ստանդարտները, սկզբունքները շատ հաճախ ընկալվում են, որպես խոչընդոտներ կամ գործոններ, որոնք շեղում են ընկերություններին իրենց հիմնական գործունեությունից:

«Ես կատեգորիկ համաձայն չեմ նման մոտեցման հետ և կարծում եմ, որ իրականում հենց դրանք են ձևավորում ուժեղ կառավարման համակարգեր և օգնում ընկերություններին՝ ավելի լավ հասկանալ ու կառավարել իրենց ռիսկերը: Երկարաժամկետ հեռանկարում հաղթում են ոչ թե այն ընկերությունները, որոնք ունեն ավելի քիչ կանոններ կամ ստանդարտներ, այլ այն ընկերությունները, որոնք ունեն ավելի որակյալ և բալանսավորված կառավարում»,-նկատեց նա՝ ևս մեկ անգամ շեշտելով, որ ռիսկերի կառավարումը խնդիրների մասին չէ, այն ապագայի նկատմամբ պատրաստ լինելու մշակույթ է։

Արտյոմ Պետրոսյանի համոզմամբ՝ վերոնշյալ մոտեցումը հատկապես կարևոր է մեր տարածաշրջանում, որտեղ առկա է աշխարհաքաղաքական արագ փոփոխվող միջավայր և տուրբուլենտություն:

«Նման իրականության մեջ կառավարման հասունությունը դրսևորվում է ընկերության՝ ժամանակին ռիսկերը ախտորոշելու, գնահատելու և ճիշտ որոշումներ կայացնելու կարողությամբ, որոնք թույլ կտան ընկերությանը պահպանել աշխատանքի կայունությունը նույնիսկ բարձր անորոշության պայմաններում: Գիտեք, ընկերության կայունությունը որոշվում է ոչ թե ռիսկերի բացակայությամբ, այլ դրանց կառավարման համակարգի որակով»,- ընդգծեց նա։

Պետրոսյանը տեղեկացրեց, որ Հանձնաժողովն արդեն իսկ սկսել է աշխատել իր առաջին հարցի վրա․ կազմում է վերլուծական դիտարկում Իրանի շուրջ ընթացող տարածաշրջանային զարգացումների հնարավոր ազդեցության մասին՝ Ընկերության գործունեության վրա:

«Արդեն այս փուլում, կարելի է նշել, որ նման աշխատանքը հնարավորություն է տալիս համակարգված և բազմակողմանի կերպով վերլուծել արտաքին միջավայրը և ժամանակին մշակել կշռադատված կառավարման որոշումներ։ Ընդհանուր առմամբ՝ սա ժամանակակից կորպորատիվ կառավարման և ռիսկերի կառավարման ստանդարտ գործելակերպի մաս է, որն ուղղված է բիզնեսի կայունության ապահովմանը»,- եզրափակեց Կայուն զարգացման, ԲՍԿ և ռիսկերի հանձնաժողովի նախագահը։

Հանձնաժողովի գործառույթների և ամբողջական կազմի մասին մանրամասները՝ ԶՊՄԿ կայքում։