2 րոպեի ընթերցում
Ռուսաստանի արտաքին գործերի նախարարությունը հայտարարություն է տարածել՝ դատապարտելով Իրանի դեմ Ամերիկայի Միացյալ Նահանգների և Իսրայելի ռազմական գործողությունները։
«Վաշինգտոնն ու Թել Ավիվը հերթական վտանգավոր արկածախնդրությունն են ձեռնարկել, որը տարածաշրջանը մոտեցնում է հումանիտար, տնտեսական, և, բացառված չէ, ռադիոլոգիական աղետի։ Ագրեսորների նպատակները պարզ են և նրանց կողմից հռչակվում են լիովին բաց՝ խաթարել սահմանադրական կարգը և ոչնչացնել իրանց համար ոչ ցանկալի ղեկավարությանը, որը հրաժարվել է ենթարկվել ուժային դիկտատուրային»,- «Արմենպրես»-ի փոխանցմամբ՝ նշված է ՌԴ ԱԳՆ տարածած հայտարարությունում։
Ռուսաստանի արտաքին քաղաքական գերատեսչությունն ընդգծել է, որ իրականացվող գործողությունների ու դրա հետևանքների ամբողջ պատասխանատվությունը կրում են ԱՄՆ-ն ու Իսրայելը։
Փետրվարի 28-ի առավոտյան Իսրայելի արտաքին գործերի նախարարությունը հայտարարել էր, որ Իսրայելը կանխարգելիչ հարված է հասցրել Իրանին՝ Իսրայելին սպառնացող վտանգը չեզոքացնելու համար։ Իրանական լրատվամիջոցներն էլ հայտնել էին Թեհրանում, Սպահանում և մի շարք այլ քաղաքներում պայթյունների մասին։
ԱՄՆ նախագահ Դոնալդ Թրամփը ևս հայտարարել է Իրանի դեմ լայնածավալ մարտական գործողություններ սկսելու մասին՝ շեշտելով, որ «դրանց նպատակն ամերիկյան ժողովրդին պաշտպանելն է Իրանի ռեժիմի սպառնալիքներից»։
Իրանը իր հերթին բալիստիկ հրթիռներ ու ԱԹՍ-ներ է ուղարկել Իսրայելի ուղղությամբ, ինչպես նաև թիրախավորել է Կատարում, Քուվեյթում, Բահրեյնում և ԱՄԷ-ում տեղակայված ԱՄՆ ռազմաբազաները։