Հունգարիայի վարչապետը հորդորել է Զելենսկիին վերաբացել «Բարեկամություն» նավթամուղը

Հունգարիայի վարչապետ Վիկտոր Օրբանն Ուկրաինայի նախագահ Վոլոդիմիր Զելենսկիին ուղղված բաց նամակ է հրապարակել՝ մեղադրելով նրան ռուս-ուկրաինական հակամարտության մեջ ներքաշելու փորձի մեջ։

Ինչպես հաղորդում է «Արմենպրես»-ը, X սոցիալական ցանցի իր էջում հրապարակած նամակի մեջ Օրբանը, դիմելով Զելենսկիին, մասնավորապես ասել է․

«Չորս տարի շարունակ Դուք չեք կարողացել ընդունել Հունգարիայի ինքնիշխան կառավարության և հունգարացի ժողովրդի դիրքորոշումը ռուս-ուկրաինական պատերազմի վերաբերյալ: Չորս տարի շարունակ Դուք աշխատել եք Հունգարիային ձեր երկրի և Ռուսաստանի միջև պատերազմի մեջ ներքաշելու ուղղությամբ: Այս ընթացքում Դուք ստացել եք Բրյուսելի աջակցությունը և ապահովել հունգարական ընդդիմության աջակցությունը: Մենք նաև տեսնում ենք, որ Դուք, Բրյուսելը և հունգարական ընդդիմությունը համակարգում եք ջանքերը՝ Հունգարիայում իշխանության բերելու ուկրաինամետ կառավարություն: Վերջին օրերին դուք փակել եք «Բարեկամություն» նավթամուղը, որը կարևոր է Հունգարիայի էներգամատակարարման համար: Ձեր գործողությունները հակասում են Հունգարիայի շահերին և վտանգում են հունգարական ընտանիքների անվտանգ և մատչելի էներգամատակարարումը: Հետևաբար, ես կոչ եմ անում ձեզ փոխել ձեր հակահունգարական քաղաքականությունը»:

Open Letter to President Volodymyr Zelenskyy

Mr. President,

For four years, you have been unable to accept the position of the sovereign Hungarian government and the Hungarian people regarding the Russia–Ukraine war.

For four years, you have been working to force Hungary into…

— Orbán Viktor (@PM_ViktorOrban) February 26, 2026

Օրբանը հայտարարել է, որ Հունգարիայի ժողովուրդը պատասխանատու չէ այն իրավիճակի համար, որում հայտնվել է Ուկրաինան։ «Մենք համակրում ենք ուկրաինացի ժողովրդին, բայց չենք ցանկանում մասնակցել պատերազմին: Մենք չենք ցանկանում ֆինանսավորել պատերազմական ջանքերը և չենք ցանկանում ավելի շատ վճարել էներգիայի համար: Ես կոչ եմ անում ձեզ անհապաղ վերաբացել «Բարեկամություն» նավթամուղը և զերծ մնալ Հունգարիայի էներգետիկ անվտանգության վրա հետագա հարձակումներից»,- հայտարարել է Օրբանը՝ կոչ անելով հարգել իր երկիրը: