ԱՄՆ-ն Մերձավոր Արևելք է ուղարկել F-35A կործանիչների և ՌԷՊ-ի ինքնաթիռների խմբեր. ItaMilRadar
2 րոպեի ընթերցում
Պենտագոնը Մերձավոր Արևելք է ուղարկել F-35A Lightning II հինգերորդ սերնդի վեց կործանիչից և E/A-18G Growler ռադիոէլեկտրոնային պայքարի վեց ինքնաթիռից բաղկացած խմբեր: «Արմենպրես»-ի փոխանցմամբ՝ այս մասին հաղորդում է Իտալիայի և Միջերկրական ծովի երկնքով ռազմական թռիչքներին հետևող ItaMilRadar հրատարակությունը։
Ամերիկյան ինքնաթիռները հանգստյան օրերին անդրատլանտյան թռիչք են կատարել լցավորող ինքնաթիռների աջակցությամբ և Ազորյան կղզիներում ու Իսպանիայում միջանկյալ վայրէջքներ կատարելով՝ այնուհետև թռիչքները շարունակել են Մերձավոր Արևելքի ուղղությամբ։
Ենթադրվում է, որ երկու ավիացիոն խմբերն այժմ տեղակայված են Հորդանանի Մուվաֆաք Սալթի ավիաբազայում։
Անցյալ շաբաթ ԱՄՆ-ն Կատարի Ալ Ուդեյդի ավիաբազայում նաև տեղակայել է RC-135V/W Rivet Joint ռադիոէլեկտրոնային հետախուզական ինքնաթիռը և E-11A BACN ինքնաթիռը, որը նախատեսված է Սաուդյան Արաբիայի «Արքայազն Սուլթան» բազայում մարտական գործողությունների պայմաններում զորքերի կապն ապահովելու համար:
Բացի այդ, Մերձավոր Արևելքի դիրքերում ներկայում տեղակայված են Patriot զենիթահրթիռային համակարգեր և THAAD հակահրթիռային պաշտպանության համակարգեր՝ ամերիկյան ռազմական գործողության դեպքում իրանական հնարավոր հակագրոհներից պաշտպանվելու համար։