1 րոպեի ընթերցում
ԱՄՆ նախագահ Դոնալդ Թրամփը հայտարարել է, որ ակնկալում է, որ Չինաստանի նախագահ Սի Ծինփինը տարեվերջին կայցելի Միացյալ Նահանգներ։ «Արմենպրես»-ի փոխանցմամբ՝ այս մասին Թրամփը հայտարարել է Դավոսից Վաշինգտոն մեկնող ինքնաթիռում լրագրողների հետ զրույցում, որը հեռարձակել է Սպիտակ տունը։
«Ես մեկնելու եմ ապրիլին։ Նա կգա տարեվերջին, և ես անհամբեր սպասում եմ նախագահ Սիին տեսնելուն», - նշել է Թրամփը՝ ավելացնելով, որ նա հրաշալի մարդ է։
Թրամփը նաև նշել է նախկինում լարված հարաբերությունների մասին, սակայն հավելել է, որ հիմա դրանք հիանալի հարաբերություններ են։
«Նայեք, թե ինչ գյուղատնտեսական արտադրանք են նրանք գնում։ Սոյա են գնում, շատ սոյա, և դա մեր ֆերմերներին ուրախացնում է և դա ինձ էլ է ուրախացնում», - նշել է նա։
Հոկտեմբերին Սի Ծինփինի հետ հեռախոսազրույցից հետո Թրամփը հայտարարել էր, որ ընդունել է նրա հրավերը՝ 2026 թվականի ապրիլին Չինաստան այցելելու համար։ Նա նշել էր, որ Չինաստանի առաջնորդը այնուհետև պետական այց կկատարի Միացյալ Նահանգներ։