Ադրբեջանին անընդհատ փոխանցում ենք մեսիջը, որ «արևմտյան Ադրբեջան» խոսույթը չի նպաստում խաղաղության գործընթացին. Խանդանյան
2 րոպեի ընթերցում
Հայաստանի խորհրդարանի արտաքին հարաբերությունների մշտական հանձնաժողովի նախագահ Սարգիս Խանդանյանն անդրադարձել է Ադրբեջանի կողմից պարբերաբար շրջանառվող այսպես կոչված «արևմտյան Ադրբեջան» խոսույթին՝ շեշտելով, որ դա օգտակար չէ Հայաստանի և Ադրբեջանի միջև խաղաղության գործընթացի համար։
«Արմենպրես»-ի փոխանցմամբ՝ Խանդանյանն այդ մասին ասել է խորհրդարանում լրագրողների հետ զրույցում:
«Ադրբեջանի կողմից «արևմտյան Ադրբեջան» խոսույթի վերաբերյալ նաև միջազգային հարթակներում հրապարակային խոսել ենք, Կառավարության կողմից ամենաբարձր մակարդակով հնչեցվել է, որ դա օգտակար չէ խաղաղության գործընթացի համար՝ հատկապես նոր իրողություններում: Անընդհատ Ադրբեջանին տալիս են այս մեսիջը, որ սա չի նպաստում այն պրոցեսներին, որոնք հիմա տեղի են ունենում Հայաստանի և Ադրբեջանի միջև: Պետք է խոստովանեմ, որ որոշ առումով դա մեղմվել է: Բայց, այնուհանդերձ, պետք է փորձենք խաղաղության գործընթացին համապատասխանեցնել նաև խաղաղության խոսույթը»,-ասաց Խանդանյանը:
Նա նշեց՝ խաղաղությունը գործընթաց է, մեկօրյա իրադարձություն չէ: Դա պրոցես է, որը պետք է շենքի պես կառուցվի՝ քայլ առ քայլ, այդ թվում՝ համապատասխանեցնելով խոսույթը այն իրողություններին ու գործընթացներին, որոնք տեղի են ունենում տարածաշրջանում:
Անդրադառնալով հարցին՝ Հայաստանի իշխանությունն այս փուլում չի՞ քննարկում այսպես կոչված «ադրբեջանցիների վերադարձի հարց»՝ Խանդանյանը պատասխանեց. «Այդ խոսակցությունը Հայաստանի իշխանությունը որևէ փուլում էլ չի քննարկի: Հատկապես այնպիսի շեշտադրումներով, ինչպես տևական ժամանակ խոսել է Ադրբեջանը: Դա ընդհանրապես չի նպաստում խաղաղության մթնոլորտին»: