Եմենի իշխանությունները 90 օրով արտակարգ դրության ռեժիմ են սահմանել և ԱՄԷ ուժերից պահանջել դուրս գալ երկրից
3 րոպեի ընթերցում
Եմենի իշխանությունները 90 օրով արտակարգ դրություն և 72-ժամյա շրջափակում են հայտարարել ամբողջ երկրում։ Բացի այդ, երկրի իշխանություններն Արաբական Միացյալ Էմիրությունների ուժերից պահանջել են 24 ժամվա ընթացքում դուրս գալ Եմենի տարածքից։ «Արմենպրես»-ի փոխանցմամբ՝ այս մասին հաղորդում է Al Arabiya-ն։
Ըստ հրապարակման՝ Եմենի նախագահական կառավարման խորհրդի նախագահ Ռաշադ ալ-Ալիմին հայտարարել է 72-ժամով օդային, ցամաքային և ծովային շրջափակման մասին Եմեն մուտք գործելու բոլոր կետերում, ինչպես նաև 90 օրով սահմանել է արտակարգ դրության ռեժիմ, որը կարող է երկարաձգվել։
Կառավարությունը նաև պահանջել է ԱՄԷ բոլոր ուժերի դուրսբերումը երկրից 24 ժամվա ընթացքում՝ նշելով, որ Եմենը չի կարող դիմակայել նոր ճակատների բացմանը։
«Մենք ուժեղ ենք Սաուդյան Արաբիայի գլխավորած կոալիցիայի աջակցության շնորհիվ», - հավելել է նա։
Սաուդյան Արաբիան դեկտեմբերի 30-ի վաղ առավոտյան հարվածներ է հասցրել Եմենի Էլ Մուքալա նավահանգստային քաղաքին՝ թիրախավորելով Ֆուջեյրայից (ԱՄԷ) ժամանած երկու նավ, որոնք «մեծ քանակությամբ զենք ու մարտական մեքենաներ» էին տեղափոխում Հարավային անցումային խորհրդի (ՀԱԽ) ուժերին, որոնց աջակցում է Արաբական Միացյալ Էմիրությունները։
Դեկտեմբերին ՀԱԽ-ն իր վերահսկողության տակ է վերցրել երկրի հարավում գտնվող երկու նահանգները, որոնք մինչ այդ կառավարվում էին միջազգայնորեն ճանաչված Եմենի կառավարության կողմից։ Ավելի ուշ ՀԱԽ-ի ղեկավար Այդարուս Քասեմ Աբդուլ Ազիզ ազ Զուբեյդին հայտարարել է, որ այժմ ժամանակն է անցնել երկրի հյուսիսը, այդ թվում՝ մայրաքաղաք Սանան վերահսկող հութիների դեմ գործողությանը։
ՀԱԽ-ը հանդես է գալիս, այդ թվում, Եմենի հարավային շրջանների անջատման օգտին։
Եմենում հակամարտությունն սկսվել է 2014 թվականին։ Այն ժամանակ հութիները, որոնց աջակցում է Իրանը, գրավեցին երկրի մայրաքաղաք Սանան և Եմենի հյուսիսի մեծ մասը։ Արաբական կոալիցիան, որը 2015 թվականին միջամտել է հակամարտությանը, աջակցում է Եմենի կառավարական զորքերին։ Դրա հետ մեկտեղ ԱՄԷ-ն, որը վարժեցնում և ֆինանսավորում է ՀԱԽ-ի հովանու տակ գտնվող խմբավորումներին, նույնպես մտնում է կոալիցիայի մեջ։