2 րոպեի ընթերցում
Սաուդյան Արաբիան դեկտեմբերի 30-ի վաղ առավոտյան հարվածներ է հասցրել Եմենի Էլ Մուքալա նավահանգստային քաղաքին: «Արմենպրես»-ի փոխանցմամբ՝ այս մասին հաղորդում է սաուդյան SPA գործակալությունը։
Նշվում է, որ հարվածների թիրախը եղել է Ֆուջեյրայից (ԱՄԷ) ժամանած երկու նավ, որոնք «մեծ քանակությամբ զենք ու մարտական մեքենաներ» էին տեղափոխում Հարավային անցումային խորհրդի (ՀԱԽ) ուժերին, որոնց աջակցում է Արաբական Միացյալ Էմիրությունները։
«Հաշվի առնելով այս զենքից եկող անվտանգությանը և կայունությանը սպառնացող վտանգն ու էսկալացիան՝ կոալիցիայի օդուժն այս առավոտյան սահմանափակ ռազմական գործողություն է իրականացրել՝ թիրախավորելով նավահանգստում գտնվող երկու նավերից բեռնաթափված զենքը և մարտական մեքենաները», - ասվում է զինվորականների հաղորդագրության մեջ, որը մեջբերել է գործակալությունը։
Սաուդցի զինվորականները հայտարարել են, որ գրոհն իրականացվել է գիշերը՝ «կողմնակի վնասներ չպատճառելու» համար։
Զոհերի մասին չի հաղորդվում։
Դեկտեմբերին ՀԱԽ-ն իր վերահսկողության տակ է վերցրել երկրի հարավում գտնվող երկու նահանգները, որոնք մինչ այդ կառավարվում էին միջազգայնորեն ճանաչված Եմենի կառավարության կողմից։
Ավելի ուշ ՀԱԽ-ի ղեկավար Այդարուս Քասեմ Աբդուլ Ազիզ ազ Զուբեյդին հայտարարել է, որ այժմ ժամանակն է անցնել երկրի հյուսիսը, այդ թվում՝ մայրաքաղաք Սանան վերահսկող հութիների դեմ գործողությանը։
ՀԱԽ-ը հանդես է գալիս, այդ թվում, Եմենի հարավային շրջանների անջատման օգտին։
Եմենում հակամարտությունն սկսվել է 2014 թվականին։ Այն ժամանակ հութիները, որոնց աջակցում է Իրանը, գրավեցին երկրի մայրաքաղաք Սանան և Եմենի հյուսիսի մեծ մասը։ Արաբական կոալիցիան, որը 2015 թվականին միջամտել է հակամարտությանը, աջակցում է Եմենի կառավարական զորքերին։ Դրա հետ մեկտեղ ԱՄԷ-ն, որը վարժեցնում և ֆինանսավորում է ՀԱԽ-ի հովանու տակ գտնվող խմբավորումներին, նույնպես մտնում է կոալիցիայի մեջ։