Կայացան ՀՀ վարչապետի հովանու ներքո անցկացվող «Դպրոցականների վոլեյբոլի լիգա» Շիրակի մարզային փուլի մրցումները

Գյումրիում կայացան ՀՀ վարչապետի հովանու ներքո անցկացվող «Դպրոցականների վոլեյբոլի լիգա» 2025 թվականի մարզական խաղերի Շիրակի մարզային փուլի մրցումները։ Խաղերի նպատակն է խթանել վոլեյբոլի տարածումը դպրոցականների շրջանում, հայտնաբերել հեռանկարային մարզիկներին և նպաստել երեխաների առողջության ամրապնդմանը։

Ինչպես «Արմենպրես»-ին տեղեկացրին մարզպետի աշխատակազմից,   մրցումներն անցկացվել են երկու տարիքային խմբերում՝ 6-7-րդ և 8-9-րդ դասարանների տղաների ու աղջիկների թիմերի միջև։ Խաղի ընթացքում յուրաքանչյուր թիմ հանդես էր գալիս 3 տղա և 3 աղջիկ կազմով։ Մասնակիցները համայնքային փուլում հաղթող դարձած դպրոցական հավաքականներն էին։

Արթիկի թիվ 4 հիմնական և Մարալիկի թիվ 1 միջնակարգ դպրոցների թիմերը ստացան հնարավորություն ներկայացնելու Շիրակի մարզը դեկտեմբերի 20-25-ին Երևանում նախատեսված վոլեյբոլի լիգայի հանրապետական եզրափակիչ փուլում։