3 րոպեի ընթերցում
Չինաստանի իշխանությունները վճռականորեն աջակցում են պաղեստինցի ժողովրդին և ակտիվորեն կօժանդակեն պաղեստինյան հարցի արդարացի լուծմանը: «Արմենպրես»-ի փոխանցմամբ՝ այս մասին հայտարարել է Չինաստանի նախագահ Սի Ծինփինը ամեն տարի նոյեմբերի 29-ին նշվող Պաղեստինցի ժողովրդի հետ համերաշխության միջազգային օրվա առթիվ ՄԱԿ-ում կայացած նիստի մասնակիցներին իր ուղերձում։
«Որպես ՄԱԿ-ի Անվտանգության խորհրդի մշտական անդամ՝ Չինաստանը վճռականորեն աջակցում է պաղեստինցի ժողովրդի արդար գործին՝ իր օրինական ազգային իրավունքների վերականգնման հարցում։ Չինաստանն այսուհետ էլ կփոխգործակցի միջազգային հանրության հետ, կգործադրի անդուլ ջանքեր պաղեստինյան խնդրի համապարփակ, արդարացի և հաստատուն կարգավորմանը շուտափույթ հասնելու համար», - ուղերձից հատված է մեջբերում ՏԱՍՍ գործակալությունը։
Ինչպես ընդգծել է Սի Ծինփինը, Պաղեստինի հարցը «ստուգում է գլոբալ կառավարման համակարգի արդյունավետությունը»։ Նրա խոսքով՝ չինական կողմը միջազգային հանրությանը կոչ է անում ուշադրություն դարձնել պաղեստինյան հիմնախնդրի արմատական պատճառներին, «ցուցաբերել պատասխանատվություն» և ձեռնարկել պատշաճ միջոցներ պատմական անարդարությունը շտկելու համար։
Չինաստանի նախագահն ուշադրություն է հրավիրել պաղեստինյան հարցի կարևորագույն նշանակության վրա, որն զգալի չափով ազդում է տարածաշրջանի կայունության և Մերձավոր Արևելքում հակամարտությունների կարգավորման վրա: Ինչպես ընդգծել է Չինաստանի ղեկավարը, ստեղծված իրավիճակում միջազգային հանրությունը պետք է էլ ավելի ամրապնդի փոխհամաձայնությունը, ավելի ակտիվ միջոցներ ձեռնարկի Գազայի հատվածում համապարփակ հրադադարի հասնելու ուղղությամբ, կանխի ռազմական գործողությունների վերսկսումը։
«Գազայի հետպատերազմյան կառավարումը և վերականգնումը պետք է իրականացվեն «պաղեստինցիներն են կառավարում Պաղեստինը» սկզբունքին համապատասխան՝ հարգելով պաղեստինցի ժողովրդի կամքը, հաշվի առնելով տարածաշրջանի երկրների ռացիոնալ անհանգստությունը։ Անհրաժեշտ է հնարավորինս շուտ բարելավել Գազայում հումանիտար իրավիճակը և մեղմել պաղեստինյան ժողովրդի տառապանքները», - հավելել է Սի Ծինփինը։