2 րոպեի ընթերցում
Ռուսաստանի արտաքին գործերի նախարար Սերգեյ Լավրովը և Իրանի նրա պաշտոնակից Աբբաս Արաղչին հեռախոսազրույցի ընթացքում քննարկել են երկկողմ հարաբերությունները և տարածաշրջանի խնդիրները։ «Արմենպրես»-ի փոխանցմամբ՝ այս մասին հաղորդագրություն է տարածել ՌԴ արտաքին գործերի նախարարությունը։
«Լավրովը և Արաղչին քննարկել են Մերձավոր Արևելքում տեղի ունեցող իրադարձությունների զարգացումը, առաջին հերթին՝ պաղեստինաիսրայելական կարգավորման գործում, և այս խնդրի քննարկումը ՄԱԿ-ի Անվտանգության խորհրդում, ինչպես նաև իրադրությունը ԱԷՄԳ-ի կառավարիչների խորհրդում, որտեղ Ֆրանսիան, Մեծ Բրիտանիան և Գերմանիան փորձում են հակաիրանական արշավ սանձազերծել», - նշված է ՌԴ ԱԳՆ հաղորդագրության մեջ։
Երկու նախարարները նաև կոչ են արել Աֆղանստանին ու Պակիստանին շարունակել երկխոսությունը սահմանային բախումներից հետո։
«Նախարարները ողջունել են Քաբուլի և Իսլամաբադի միջև Կատարի և Թուրքիայի իշխանությունների միջնորդությամբ ձեռք բերված համաձայնությունը՝ աֆղանապակիստանյան սահմանային շրջանում փոխադարձ հրադադարի և փոխհրաձգությունները դադարեցնելու շուրջ։ Նրանք կոչ են արել շարունակել երկխոսությունը երկու բարեկամ պետությունների միջև՝ տարաձայնությունները քաղաքական ու դիվանագիտական միջոցներով լուծելու համար՝ ի շահ տարածաշրջանային կայունության և անվտանգության ապահովման», - հավելել են ՌԴ ԱԳՆ-ում։
Լավրովը և Արաղչին նաև կարծիքներ են փոխանակել երկկողմ հարաբերությունների մի շարք հարցերի շուրջ և վերահաստատել փոխադարձ հանձնառությունը՝ անվերապահորեն իրականացնել հոկտեմբերի 2-ին ուժի մեջ մտած Համապարփակ ռազմավարական գործընկերության մասին պայմանագիրը։