368.52
Հայաստանի և Ադրբեջանի միջև պատմական համաձայնագիրը նոր դռներ է բացել. Եվրանեսթի համանախագահ
2 րոպեի ընթերցում
Երևանում անցկացվող Եվրանեսթ խորհրդարանական վեհաժողովի 12-րդ լիագումար նստաշրջանում վեհաժողովի համանախագահ Սերգեյ Լագոդինսկին Հայաստանի և Ադրբեջանի միջև նախաստորագրված խաղաղության համաձայնագիրը որակեց որպես պատմական ձեռքբերում։
«Հայաստանի և Ադրբեջանի միջև նախաստորագրված պատմական համաձայնագիրը նոր դռներ է բացել։ Ես տեսնում եմ իրական ձգտում առաջ շարժվելու և բարգավաճելու։ Սա մեզ հույս է տալիս, որ կապերն ու գործընկերությունը կկառուցվեն վստահության վրա»,- «Արմենպրես»-ի հաղորդմամբ՝ ասաց նա։
Լագոդինսկին նշեց, որ Եվրամիության դիրքորոշումը խաղաղության հարցում հստակ և միասնական է։
«Կարևոր չէ, թե որքան ապատեղեկատվություն է տարածվում մեր եվրոպական դիրքորոշման վերաբերյալ․ մենք միաձայն և հանձնառու կերպով աջակցում ենք խաղաղության այս գործընթացին»,– նշեց Եվրանեսթի համանախագահը։
Եվրանեսթի համանախագահն անդրադարձավ նաև Հայաստանի խորհրդարանի ընդունած օրենքին Եվրամիությանն անդամակցելու գործընթաց սկսելու մասին՝ շեշտելով, որ դա վկայում է այն մասին, որ Հայաստանը եվրոպական արժեքների և ժողովրդավարության ճանապարհով առաջ գնալու ուղին է ընտրել։
Հայաստանն ու Ադրբեջանը օգոստոսի 8-ին Վաշինգտոնում նախաստորագրել են խաղաղության համաձայնագիրը։ Հայկական կողմից համաձայնագիրը նախաստորագրել է ՀՀ ԱԳ նախարար Արարատ Միրզոյանը, ադրբեջանական կողմից՝ Ադրբեջանի ԱԳ նախարար Ջեյհուն Բայրամովը։
Բաժանորդագրվեք մեր ալիքին Telegram-ում