Գեղարքունիքի որոշ դպրոցներում ընթանում են մարզադահլիճների վերանորոգման և ջեռուցման համակարգերի տեղադադրման աշխատանքներ

Գեղարքունիքի մարզի 16 հանրակրթական դպրոցում ընթանում են մարզադահլիճների վերանորոգման և ջեռուցման կենտրոնացված համակարգերի տեղադադրման աշխատանքներ։ 

Ինչպես «Արմենպրես»-ին տեղեկացրին Գեղարքունիքի մարզպետի աշխատակազմի ԿՄՍ վարչությունից, ՀՀ կառավարության կողմից ֆինանսական միջոցներ են հատկացվել Այգուտի, Զովաբերի, Սևանի  N2, Նորատուսի  N3, Ծափաթաղի, Նորատուսի  N2, Շողակաթի միջնակարգ և Նորաշենի հիմնական դպրոցներին՝ ջեռուցման տեղակայման,  Վարդենիկի  N1, Ճամբարակի N2, Վարդենիսի N4 հիմնական և  Սևանի  N6,  Գանձակի N1, Գանձակի N2, Գավառի N8, Լճափի միջնակարգ դպրոցներին՝ մարզադահլիճներում վերանորոգման աշխատանքներ իրականացնելու  համար: 

Մարզադահլիճների հիմնանորոգման նպատակով հատկացված գումարը կազմում է 123 միլիոն 612 հազար դրամ, ջեռուցման համակարգերի կառուցման նպատակով հատկացված գումարը՝ 118 միլիոն 936 հազար դրամ։

Բոլոր ուսհաստատություններում էլ այժմ ընթանում են շինարարական աշխատանքներ, որոնք ավարտվելու են այս տարվա ընթացքում։