ԵՄ հատուկ ներկայացուցիչը գոհունակություն է հայտնել Հայաստանի և Ադրբեջանի միջև խաղաղության գործընթացում դրական քայլերի առնչությամբ

Հարավային Կովկասի հարցերով Եվրամիության հատուկ ներկայացուցիչ Մագդալենա Գրոնոն գոհունակություն է հայտնել Հայաստանի և Ադրբեջանի միջև խաղաղության գործընթացում վերջին դրական քայլերի առնչությամբ։ 

«Արմենպրես»-ի փոխանցմամբ՝ Գրոնոն այդ մասին գրել է X-ի իր միկրոբլոգում։ 

«Շատ ոգևորված եմ Ադրբեջան-Հայաստան խաղաղության գործընթացում վերջին դրական քայլերի շարքով, այդ թվում՝ Ադրբեջանի հայտարարությունը իր տարածքով դեպի Հայաստան ապրանքների տարանցման սահմանափակումները վերացնելու մասին»,- գրել է նա։ 

Եվրոպացի պաշտոնյան նաև բարձր է գնահատել հոկտեմբերի 21-ին Ժնևում Հայաստանի և Ադրբեջանի խորհրդարանի խոսնակների միջև հանդիպումը, ինչպես նաև Երևանում նախատեսված կլոր-սեղան քննարկումները երկու երկրների քաղաքացիական հասարակության փորձագետների միջև:

Մագդալենա Գրոնոն նաև նշել է, որ Եվրամիությունը ջերմորեն ողջունում է «այս գործնական զարգացումները և պատրաստ է աջակցել բոլոր նմանատիպ նախաձեռնություններին և վստահության ամրապնդման լրացուցիչ միջոցառումներին»: 

«Մենք հավասարապես ողջունում ենք նաև Հայաստան-Թուրքիա հերթական հանդիպման նախապատրաստումն՝ ուղղված Գյումրի-Կարս երկաթուղու վերականգնմանը և վերագործարկմանը», - եզրափակել է պաշտոնյան։

Ադրբեջանի նախագահ Իլհամ Ալիևը հոկտեմբերի 21-ին հայտարարել է, որ Ադրբեջանը վերացրել է իր տարածքով դեպի Հայաստան բեռների տարանցման բոլոր սահմանափակումները։ «Ցանկանում եմ նշել, որ Ադրբեջանը վերացրել է բոլոր սահմանափակումները դեպի Հայաստան բեռների տարանցման համար։ Այդպիսի առաջին տարանցումը եղել է ղազախական ցորենի տեղափոխումը Հայաստան։ Կարծում եմ, որ սա նաև լավ ցուցիչ է այն բանի, որ Ադրբեջանի և Հայաստանի միջև խաղաղությունն արդեն ոչ միայն թղթի վրա է, այլ նաև գործնական արտահայտում ունի»,-Ղազախստանի նախագահ Կասիմ-Ժոմարտ Տոկաևի հետ համատեղ մամուլի ասուլիսի ժամանակ ասել է Իլհամ Ալիևը։ 

Ավելի ուշ ՀՀ վարչապետի մամուլի քարտուղար Նազելի Բաղդասարյանը հայտարարեց, որ Հայաստանը ողջունում է Ադրբեջանի նախագահի հայտարարությունը դեպի Հայաստան բեռների տարանցման բոլոր սահմանափակումները վերացնելու մասին։ Իսկ ՀՀ էկոնոմիկայի նախարար Գևորգ Պապոյանը նշել էր, որ շուտով Ղազախստանից Ադրբեջանի տարածքով Հայաստան կհասնի ցորենի առաջին խմբաքանակը։