2 րոպեի ընթերցում
Հունգարիայի արտաքին գործերի և արտաքին տնտեսական կապերի նախարար Պետեր Սիյարտոն հայտնել է, որ ՌԴ նախագահի օգնական Յուրի Ուշակովի հետ հեռախոսով քննարկել է Ռուսաստանի և ԱՄՆ ղեկավարներ Վլադիմիր Պուտինի և Դոնալդ Թրամփի՝ Բուդապեշտում կայանալիք հանդիպման նախապատրաստման հարցը։ «Արմենպրես»-ի փոխանցմամբ՝ այս մասին նա գրել է Facebook-ի իր էջում:
«Նախապատրաստությունն ընթանում է, կապի մեջ է Ռուսաստանի նախագահի արտաքին քաղաքականության գլխավոր խորհրդական Յուրի Ուշակովը», - գրել է արտգործնախարարը։
Ավելի վաղ Սիյարտոն հայտնել էր, որ հոկտեմբերի 16-ին հեռախոսով քննարկել է Բուդապեշտի գագաթնաժողովի նախապատրաստական աշխատանքները Ռուսաստանի արտաքին գործերի նախարար Սերգեյ Լավրովի և ԱՄՆ պետքարտուղարի առաջին տեղակալ Քրիստոֆեր Լանդաուի հետ։
Հոկտեմբերի 16-ին, Պուտինի հետ հեռախոսազրույցից հետո Թրամփը հայտարարել է, որ իրենք համաձայնության են եկել շուտով հանդիպել Հունգարիայի մայրաքաղաքում։ Ուշակովը նույնպես հայտարարել է, որ Մոսկվան և Վաշինգտոնն «առանց հապաղման» կսկսեն պատրաստել Ռուսաստանի և Միացյալ Նահանգների ղեկավարների նոր հանդիպումը, որը կարող է կազմակերպվել Բուդապեշտում: Հունգարիայի վարչապետ Վիկտոր Օրբանը կարգադրել է ստեղծել գագաթնաժողովի նախապատրաստման կազմկոմիտե: