2 րոպեի ընթերցում
Երևան քաղաքի առաջին ատյանի ընդհանուր իրավասության քրեական դատարանը՝ դատավոր Կարեն Ֆարխոյանի նախագահությամբ, բավարարել է քննիչի միջնորդությունը և որպես խափանման միջոց կալանք է կիրառել Արագածոտնի թեմի առաջնորդ Մկրտիչ եպիսկոպոս Պռոշյանի նկատմամբ` 2 ամիս ժամկետով։
«Արմենպրես»-ի հաղորդմամբ՝ դատարանը նաև սահմանափակել է նրա տեսակցությունները՝ թույլատրելով միայն մոր հետ հանդիպումները։
Բացի այդ, դատարանը մեկ ամսով կալանքի տակ է առել նաև Հայ Առաքելական եկեղեցու Արագածոտնի թեմի դիվանապետ Տեր Գարեգին քահանա Արսենյանին։
Ավելի վաղ, հոկտեմբերի 15-ին բերման էին ենթարկվել Արագածոտնի թեմի առաջնորդը, 12 քահանա և մի քանի աշխարհիկ աշխատակիցներ։
ՀՀ Քննչական կոմիտեն հայտնել է, որ նախաքննություն է ընթանում հավաքներ անցկացնելու կամ դրանց մասնակցելու խոչընդոտման և այդ նպատակով նյութական շահագրգռման դեպքերի առթիվ։ Կոմիտեից նշել են, որ կատարվում են վարութային և ապացուցողական անհրաժեշտ գործողություններ։
Մայր Աթոռը իրավապահների գործողությունները որակել էր որպես ապօրինի՝ նշելով, որ դրանք ուղղված են Եկեղեցու բնականոն գործունեությունը խաթարելուն և հոգևորականների նկատմամբ վախի մթնոլորտ ստեղծելուն։
Մարդու իրավունքների պաշտպանի գրասենյակը ևս արձագանքել է՝ անթույլատրելի համարելով դեպքերը, երբ փաստաբանների մուտքը վարույթն իրականացնող մարմիններ խոչընդոտվել է։ ՄԻՊ աշխատակազմը, ըստ հաղորդագրության, կապի մեջ է փաստաբանների հետ՝ նրանց տրամադրելով տեղեկատվություն վստահորդների գտնվելու վայրերի մասին։