44-օրյա պատերազմի օրերին մարդու իրավունքների զանգվածային խախտումները խորը հետք են թողել հազարավոր մարդկանց ճակատագրերի վրա. ՄԻՊ
2 րոպեի ընթերցում
Ղարաբաղյան 44-օրյա պատերազմի օրերին ու դրանից հետո տեղի ունեցած մարդու իրավունքների զանգվածային խախտումները խոր հետք են թողել հազարավոր մարդկանց ճակատագրերի վրա։
«Արմենպրես»-ի փոխանցմամբ՝ այս մասին «Ֆեյսբուք»-ի իր էջում գրել է ՀՀ մարդու իրավունքների պաշտպան Անահիտ Մանասյանը։
«44-օրյա մարտական գործողությունների օրերին ու դրանից հետո տեղի ունեցած մարդու իրավունքների զանգվածային խախտումները խորը հետք են թողել հազարավոր մարդկանց ճակատագրերի վրա։
Հայաստանի մարդու իրավունքների պաշտպանը վերահաստատում է իր հանձնառությունը՝ մանդատի բոլոր գործիքակազմերով հետևողականորեն պաշտպանելու պատերազմի ազդեցությունը կրած անձանց ու ընտանիքների իրավունքները՝ որպես կարևոր նպատակ ունենալով մարդու իրավունքների գերակայության, արժանապատիվ կյանքի, խաղաղ ու անվտանգ ապագայի երաշխավորումը»,- գրել է Մանասյանը։
2025 թվականին սեպտեմբերի 27-ին լրանում է 44-օրյա պատերազմի մեկնարկի հինգերորդ տարելիցը։
2020 թվականի սեպտեմբերի 27-ին, ժամը 07։10-ին, Ադրբեջանը լայնածավալ հարձակում սկսեց Լեռնային Ղարաբաղի դեմ։ Պատերազմը տևեց 44 օր և ավարտվեց նոյեմբերի 9-ին՝ Հայաստանի, Ռուսաստանի և Ադրբեջանի ղեկավարների եռակողմ հայտարարությամբ։
ՀՀ քննչական կոմիտեի 2022 թվականի մարտին հրապարակած տվյալներով՝ Ադրբեջանի կողմից սանձազերծված ագրեսիվ պատերազմի հետևանքով Լեռնային Ղարաբաղում և ՀՀ-ում զոհվել է 3822 զինծառայող և քաղաքացիական անձ։ Նույն տվյալների համաձայն՝ 2022 թվականի մարտի 21-ի դրությամբ անհայտ է 187 զինծառայողի և 21 քաղաքացիական անձի գտնվելու վայրը։