Podcast․Վարչական դատավարության հայցերի ավելի քան 50 տոկոսը ներկայացվել է էլեկտրոնային եղանակով
2 րոպեի ընթերցում
Վարչական դատավարության էլեկտրոնային նոր համակարգի գործարկումից մեկ ամիս անց հայցերի ավելի քան 50 տոկոսը ներկայացվել է թվային եղանակով։
Այս մասին «Արմենպրես»-ի հետ փոդքասթի ձևաչափով զրույցում նշեց Արդարադատության նախարարի տեղակալ Տիգրան Դադունցը։
Նրա խոսքով՝ համակարգի մշակումը մեկնարկել է 2023 թվականի հունիսին և հանդիսանում է կառավարության 2022-2026թթ․ դատաիրավական բարեփոխումների ռազմավարության մի մասը։ Այն ուղղված է դատարանների ծանրաբեռնվածության նվազեցմանը, գործընթացների թվայնացմանը և ավտոմատացմանը։
«Դատարանների ծանրաբեռնվածության վրա լուրջ ազդեցություն ունի գործերի հետ կապված ամենօրյա տեխնիկական աշխատանքը՝ թղթաբանություն, գործավարություն, ծանուցումներ, ակտերի պատրաստում։ Երբ այդ ամենը տեղափոխվում է թվային դաշտ և ավտոմատացվում է, աշխատանքի արդյունավետությունը մի քանի անգամ բարձրանում է։ Դատավորներն ու աշխատակազմը հնարավորություն են ստանում ավելի շատ ժամանակ հատկացնել բովանդակային գործերին, ինչը հանգեցնում է նիստերի ավելի արագ նշանակման ու ակտերի արագ տրամադրման»,-ասաց Դադունցը։
Ամփոփելով մեկ ամսվա արդյունքները՝ Տիգրան Դադունցը նշեց, որ այս պահին համակարգում գրանցված է ավելի քան 2000 հայցադիմում, որոնցից մոտ 1110-ը ներկայացվել են էլեկտրոնային եղանակով։
«Այսինքն՝ հայցերի ավելի քան 50 տոկոսը թվայնացված ձևաչափով է, ինչը շատ լավ ցուցանիշ է և համապատասխանում է մեր սպասումներին»,- ասաց նա։
Մանրամասները` Podcast-ում