2 րոպեի ընթերցում
Եվրահանձնաժողովն ընդունել է Մոսկվայի դեմ պատժամիջոցների 19-րդ փաթեթը, որի նպատակն է ճնշում գործադրել Ռուսաստանի վրա այնքան ժամանակ, մինչև երկիրը դադարեցնի Ուկրաինայի դեմ պատերազմը։ «Արմենպրես»-ի փոխանցմամբ՝ այս մասին հայտնել է ԵՄ արտաքին գործերի և անվտանգության քաղաքականության հարցերով բարձր ներկայացուցիչ Կայա Կալասը՝ X-ում ներկայացնելով նոր փաթեթի վերաբերյալ մանրամասներ։
«Էներգակիրների վաճառքից ստացվող գումարը թույլ է տալիս Ռուսաստանին շարունակել պատերազմը։ Այնպես որ, մենք կթիրախավորենք այդ եկամուտները՝ 118 նոր նավեր դասակարգելով որպես ստվերային նավատորմ», - գրել է Կալասը։
Նա նաև հայտնել է, որ Եվրամիության նպատակն է արագացնել ռուսական հեղուկացված բնական գազից փուլային հրաժարումը մինչև 2027 թ. հունվարի 1-ը։
Կալասը նաև նշել է, որ պատժամիջոցների նոր փաթեթում առաջարկվում է գործողություններ ձեռնարկել երրորդ երկրներում ֆինանսական խուսանավման ռուսական սխեմաների դեմ։ Այս առնչությամբ կթիրախավորվի նաև ռուսական կրեդիտ քարտերի ՄԻՐ համակարգը։
«Մենք մեր արտահանման արգելքներին և Ռուսաստանի, ինչպես նաև Չինաստանի ու Հնդկաստանի կազմակերպությունների նկատմամբ արտահանման ավելի խիստ վերահսկողությանն ավելացնում ենք ավելի շատ քիմիական նյութեր, մետաղական բաղադրիչներ, աղեր և հանքաքարեր», - գրել է Կալասը։
Նա հավելել է, որ այսօրվա փաթեթով առաջարկվում է պատժամիջոցների ցանկում ավելացնել Ռուսաստանի ռազմարդյունաբերական համալիրին աջակցություն տրամադրող այնպիսի երրորդ երկրներ, ինչպիսին է Չինաստանը։
«Մենք նաև պատրաստվում ենք ավելի հեշտացնել ուկրաինացի երեխաների առևանգմանը և ինդոկտրինացիային մասնակցող անձանց նկատմամբ պատժամիջոցների սահմանումը», - հավելել է ԵՄ դիվանագիտության ղեկավարը։