2 րոպեի ընթերցում
Պակիստանը մտադիր է միանալ Եվրասիական տնտեսական միությանը (ԵԱՏՄ) և արդեն իսկ իրականացնում է այս հարցի շուրջ նախապատրաստական աշխատանքներ: «Արմենպրես»-ի փոխանցմամբ՝ այս մասին ՏԱՍՍ-ին ասել է Պակիստանի առևտրի նախարարի տեղակալ Նասիր Համիդը:
«Այս պահին մենք դեռ բանակցություններ չենք վարում ԵԱՏՄ-ի հետ: Բայց մենք զբաղվում ենք նախապատրաստական աշխատանքներով և ուսումնասիրում ենք մեզ համար հնարավորությունները», - ասել է նա:
Այս համատեքստում փոխնախարարը շեշտել է, որ Պակիստանը վերջերս դիվանագիտական հարաբերություններ է հաստատել Հայաստանի հետ:
«Այսպիսով, մենք դեռ քննարկում ենք այս հարցը: Եվ հենց լուծումը հայտնվի, մենք պատրաստ կլինենք ԵԱՏՄ-ի հետ մերձենալուն», - հավելել է պաշտոնյան:
Ավելի վաղ ՏԱՍՍ-ի աղբյուրները հայտնել էին, թե Պակիստանը մտադիր է Հայաստանը ճանաչել որպես ՄԱԿ-ի անդամ պետություն, ինչի շնորհիվ «ԵԱՏՄ-ին անդամակցելու կանաչ լույս կստանա»։ Հայաստանի արտգործնախարարությունից արձագանքել էին «անտեղյակ աղբյուրների» հայտարարություններին՝ նշելով, որ Հայաստանի և Պակիստանի միջև արդեն իսկ հաստատվել են դիվանագիտական հարաբերություններ՝ ՄԱԿ-ի կանոնադրության հիմնարար սկզբունքներին համահունչ, հետևաբար, «ՄԱԿ-ում ճանաչման խնդիր օրակարգում, բնականաբար, չկա»:
Օգոստոսի 31-ին Չինաստանի Թիենծին քաղաքում անցկացվող Շանհայի համագործակցության կազմակերպութան գագաթաժողովի շրջանակներում Հայաստանի Հանրապետության արտաքին գործերի նախարար Արարատ Միրզոյանը և Պակիստանի Իսլամական Հանրապետության փոխվարչապետ և արտաքին գործերի նախարար Մոհամմադ Իշաք Դարը ստորագրել են Հայաստանի և Պակիստանի միջև դիվանագիտական հարաբերություններ հաստատելու մասին համատեղ կոմյունիկե։