3 րոպեի ընթերցում
Գեղարքունիքի մարզի փրկարար ծառայության աշխատակիցները մասնագիտական տոնի առթիվ պարգևների են արժանացել ինչպես մարզպետ Կարեն Սարգսյանի, այնպես էլ Գավառ համայնքի ղեկավար Գուրգեն Մարտիրոսյանի, Վարդենիս համայնքի ղեկավար Ահարոն Խաչատրյանի և Մարտունի համայնքի ղեկավար Հովաննես Հովեյանի կողմից։
Ինչպես «Արմենպրես»-ին տեղեկացրին Գեղարքունիքի մարզպետի և Գավառի, Մարտունու և Վարդենիսի համայնքապետարանների աշխատակազմերից, Գավառի կենտրոնական հրապարակում նշվել է «Փրկարարի օրը», որին մասնակցել են Գեղարքունիքի մարզպետի աշխատակազմի և Գավառի համայնքապետարանի, ՆԳՆ ՓԾ մարզային վարչության ներկայացուցիչներ, դպրոցականներ։
Միջոցառման ընթացքում մարզպետի տեղակալ Ջանիկ Բազեյանը հանդես է եկել շնորհավորական խոսքով։
Մասնագիտական տոնի կապակցությամբ մի խումբ փրկարարներ պարգևատրվել են Գեղարքունիքի մարզպետի շնորհակալագրերով։
Գավառ համայնքի ղեկավարի կողմից ևս շնորհվել են պատվոգրեր և շնորհակալագրեր, որոնք հանձնել է համայնքի ղեկավարի տեղակալ Գրիգոր Բոշյանը։
Պաշտոնական հատվածից հետո միջոցառմանը ներկա դպրոցականները շփվել են փրկարարների հետ, ծանոթացել նրանց աշխատանքին և հրշեջ-փրկարարական տեխնիկային։ Փրկարարները ներկայացրել են նաև իրենց մասնագիտական պատրաստվածությունը, կիրառվող տեխնիկան, այդ թվում՝ հրշեջ և բժշկական նշանակության մեքենաները, դրանց հնարավորություններն ու օգտագործման ձևերը։
Մարտունի համայնքի ղեկավար Հովհաննես Հովեյանն իր աշխատասենյակում հյուրընկալել է ՀՀ ՆԳՆ փրկարար ծառայության Գեղարքունիքի մարզային փրկարարական վարչության Մարտունու հրշեջ-փրկարարական ջոկատի հրամանատարին և ծառայողներին, ողջունել և դրվատանքի խոսքեր ուղղել նրանց՝ ընդգծելով փրկարարների կատարած գերբարդ աշխատանքն ու կյանքեր փրկելու կարևոր առաքելությունը։ Հովհաննես Հովեյանը 11 փրկարարի արժանացրել է համայնքի ղեկավարի շնորհակալագրի։
Վարդենիս համայնքի ղեկավար Ահարոն Խաչատրյանն ընդունել է ՀՀ ՆԳՆ փրկարար ծառայության Գեղարքունիքի մարզային փրկարարական վարչության Վարդենիսի հրշեջ-փրկարարական ջոկատի հրամանատարին և աշխատակիցներին։ Համայնքի ղեկավարը մասնագիտական տոնի առթիվ շնորհավորել է ներկաներին, մաղթել տոկունություն, նորանոր ձեռքբերումներ, այնուհետև 11 աշխատակցի պարգևատրել շնորհակալագրերով։
Գեղարքունիքի մարզպետ Կարեն Սարգսյանը և մարզի համայնքների ղեկավարները մասնագիտական տոնի առթիվ հանդես են եկել մարզի փրկարաններին ուղղված շնորհավորական ուղերձներով։