Սի Ծինփինը բարձր է գնահատել Չինաստանի և Ռուսաստանի խորհրդարանների միջև համագործակցությունը
2 րոպեի ընթերցում
Չինաստանի և Ռուսաստանի օրենսդիր մարմինների համագործակցությունը երկկողմ ռազմավարական գործընկերության անբաժանելի մասն է:
Ինչպես «Արմենպրես»-ը տեղեկանում է Xinhua գործակալությունից, այդ մասին հայտարարել է Չինաստանի նախագահ Սի Ծինփինը ՌԴ-ի Պետդումայի նախագահ Վյաչեսլավ Վոլոդինի հետ Պեկինում կայացած հանդիպման ժամանակ:
«Չինաստանի և Ռուսաստանի օրենսդիր մարմինների միջև համագործակցությունը երկկողմ համապարփակ ռազմավարական գործընկերության անբաժանելի մասն է: Կա հույս, որ երկու կողմերն ակտիվորեն փորձի փոխանակում կիրականացնեն պետական կառավարման և օրենսդրության բնագավառում», - ասել է Չինաստանի նախագահը:
Չինաստանի նախագահը հանդիպման ժամանակ նաև հայտարարել է, որ Չինաստանը և Ռուսաստանը պետք է խորացնեն ռազմավարական փոխվստահությունը և պաշտպանեն երկու երկրների շահերն անվտանգության ոլորտում:
«Կողմերը պետք է շարունակեն ավանդական բարեկամությունը, խորացնեն ռազմավարական փոխվստահությունը, ամրապնդեն փոխանակումները և համագործակցությունը տարբեր բնագավառներում, համատեղ պաշտպանեն երկու երկրների անվտանգության շահերը, միավորեն գլոբալ Հարավի երկրները, հավատարիմ մնան իրական բազմակողմ մոտեցմանը և նպաստեն միջազգային կարգի զարգացմանն ավելի արդար և ռացիոնալ ուղղությամբ», - ասել է Չինաստանի ղեկավարը: