2 րոպեի ընթերցում
Իրանը ուշադիր հետևում է իր հյուսիսարևմտյան սահմանի երկայնքով տեղի ունեցող զարգացումներին: «Արմենպրես»-ի հաղորդմամբ՝ ինչպես փոխանցում է Mehr-ը, այս մասին հայտարարել է Իրանի արտաքին գործերի նախարարության խոսնակ Էսմայիլ Բաղային։
Ըստ աղբյուրի՝ օգոստոսի 17-ին ռադիոհարցազրույցում նա ընդգծել է Հարավային Կովկասի ռազմավարական կարևորությունը Իրանի և տարածաշրջանային այլ պետությունների, մասնավորապես, Ռուսաստանի համար՝ հղում անելով քաղաքական, տնտեսական և աշխարհաքաղաքական նկատառումներին։
Բաղային ընդգծել է, որ Իրանը ուշադիր հետևում է Կովկասում տեղի ունեցող զարգացումներին և ոչինչ չի թերագնահատի կամ նսեմացնի դրանք։
Նրա խոսքով՝ արտաքին միջամտությունը և տարածաշրջանից դուրս ուժերի ներկայությունը տարածաշրջանում միայն կսրեն աշխարհաքաղաքական բարդությունները և չեն ծառայի որևէ կառուցողական նպատակի։
Վկայակոչելով Հայաստանի և Ադրբեջանի միջև նախաստորագրված խաղաղության համաձայնագիրը՝ Իրանի ԱԳՆ ներկայացուցիչը նշել է, որ 12-րդ հոդվածը սահմանում է, որ օտարերկրյա ռազմական ուժեր չեն տեղակայվի նրանց ընդհանուր սահմանների երկայնքով։
«Մենք շատ զգայուն ենք այս հարցի նկատմամբ, քանի որ Հայաստանը նույնպես գիտակցում է օտարերկրյա ուժերի ներկայության հետևանքները», - հավելել է Բաղային։
Նա նաև հայտնել է Իրանի պատրաստակամությունը՝ ամրապնդելու հարաբերությունները տարածաշրջանի երկրների հետ և աջակցելու Հարավային Կովկասում կայունության և անվտանգության ամրապնդմանը նպաստող ցանկացած նախաձեռնության։