Իրանը տարածաշրջանում երկարատև խաղաղության հասնելու կարևոր քայլ է համարում Հայաստանի և Ադրբեջանի միջև խաղաղության համաձայնագրի նախաստորագրումը
2 րոպեի ընթերցում
Իրանի Իսլամական Հանրապետությունը ուշադիր հետևում է Հարավային Կովկասում տեղի ունեցող զարգացումներին և այս իրադարձությունների վերաբերյալ կապի մեջ է երկու հարևան երկրների՝ Ադրբեջանի և Հայաստանի հետ։
«Արմենպրես»-ի փոխանցմամբ՝ այս մասին հայտարարություն է տարածել Իրանի արտաքին գործերի նախարարությունը՝ անդրադառնալով Հայաստանի և Ադրբեջանի միջև խաղաղության համաձայնագրի նախաստորագրմանը։
Իրանի ԱԳՆ-ն նշել է, որ Հարավային Կովկասում խաղաղությունն ու կայունությունը օգուտ են բերում տարածաշրջանի բոլոր երկրներին։
Ողջունելով երկու երկրների կողմից խաղաղության համաձայնագրի վերջնականացումը՝ Իրանի ԱԳՆ-ն դա համարել է տարածաշրջանում երկարատև խաղաղության հասնելու կարևոր քայլ։
Միևնույն ժամանակ, Իրանը մտահոգություն է հայտնել ցանկացած տեսակի արտաքին միջամտության բացասական հետևանքների վերաբերյալ, հատկապես իր ընդհանուր սահմանների մոտ, որոնք կարող են խաթարել տարածաշրջանի անվտանգությունն ու կայունությունը։
Ընդգծելով իր ազգային իրավունքներն ու շահերը պաշտպանելու համար քաղաքական, իրավական և տնտեսական միջոցառումների անհրաժեշտությունը՝ Իրանը կարծում է, որ հաղորդակցության ուղիների բացումը և տրանսպորտային ցանցերի ապաշրջափակումը կծառայեն տարածաշրջանի ժողովուրդների կայունությանը, անվտանգությանը և տնտեսական զարգացմանը միայն այն դեպքում, եթե դրանք իրականացվեն փոխադարձ շահերի, ազգային ինքնիշխանության և տարածքային ամբողջականության հարգանքի շրջանակներում՝ առանց արտաքին միջամտության։
Իրանը վերահաստատել է իր պատրաստակամությունը՝ շարունակելու կառուցողական համագործակցությունը՝ հիմնված փոխադարձ շահերի վրա՝ ինչպես Ադրբեջանի, այնպես էլ Հայաստանի հետ՝ տարածաշրջանում խաղաղությունը, կայունությունը և տնտեսական զարգացումը ապահովելու համար, այդ թվում՝ տարածաշրջանային ձևաչափերի միջոցով, ինչպիսին է 3+3 մեխանիզմը։