Միջանցք այլևս չկա, հիմնական կենտրոնացումը լինելու է տարանցիկ և զարգացման նոր պլանի վրա՝ Հայաստանի ինքնիշխանության և իրավազորության պահպանմամբ. Ալեքս Ռաուֆօղլու

Վաշինգտոնում գործող լրագրող Ալեքս Ռաուֆօղլուն որոշ մանրամասներ է ներկայացրել Հայաստանի վարչապետի, ԱՄՆ և Ադրբեջանի նախագահների մասնակցությամբ Վաշինգտոնում կայանալիք եռակողմ հանդիպման օրակարգային հարցերի վերաբերյալ՝ հայտնելով, թե ինչ փաստաթղթեր են ստորագրվելու հանդիպման արդյունքներով։ 

«Արմենպրես»-ի փոխանցմամբ՝ Ռաուֆօղլուն X-ի իր միկրոբլոգում գրել է, որ եռակողմ հանդիպմանն ընդառաջ զրուցել է ԱՄՆ մի խումբ պաշտոնյաների հետ, որոնք էլ հանդիպման օրակարգի վերաբերյալ մանրամասներ են հայտնել։ 

Նա նշում է, որ տարածաշրջանային կոմունիկացիաների ապաշրջափակման կոնտեքստում միջանցքային տրամաբանությունը դուրս է եկել, հանդիպման ժամանակ հիմնական կենտրոնացումը լինելու է  տարանցման և զարգացման նոր պլանի վրա, որը կոչվելու է «Թրամփի երթուղի միջազգային խաղաղության և բարգավաճման համար» (Trump Route for International Peace and Prosperity) և հայտնի կլինի TRIPP հապավմամբ։ 

«Միջանցք այլևս չկա։ Գագաթնաժողովի ժամանակ հիմնական կենտրոնացումը լինելու է «Թրամփի երթուղի միջազգային խաղաղության և բարգավաճման համար» կամ TRIPP անվամբ տարանցիկ և զարգացման նոր ծրագրի վրա»,- գրել է Ռաուֆօղլուն՝ շեշտելով, որ ԱՄՆ պաշտոնյաները իրեն ասել են, որ պահպանվելու է Հայաստանի ինքնիշխանությունը, տարածքային ամբողջականությունը և իրավազորությունը։

KyivPost-ում հրապարակված հոդվածում Ռաուֆօղլուն այլ մանրամասներ ևս հայտնել է։ 

Մասնավորապես նա նշել է, որ TRIPP-ը ռազմական կամ պաշտպանական նախաձեռնություն չէ: Նրա խոսքով՝ ԱՄՆ պաշտոնյաները հստակ նշել են, որ ԱՄՆ-ն չի տրամադրում «անվտանգության խիստ երաշխիք» կամ ուժեր չի տեղակայում երթուղում: Դրա փոխարեն, ԱՄՆ-ի ներգրավվածությունը կլինի զուտ առևտրային, ընդ որում՝ ԱՄՆ-ն կստանձնի պատասխանատվություն՝ ապահովելու երթուղու անվտանգ գործունեությունը բոլոր կողմերի համար՝ բարձրակարգ օպերատորների հետ համաձայնագրերի միջոցով: 

Ալեքս Ռաուֆօղլուն գրել է նաև, որ օգոստոսի 8-ին կայանալիք հանդիպմանը Հայաստանի վարչապետ Նիկոլ Փաշինյանը և Ադրբեջանի նախագահ Իլհամ Ալիևը կստորագրեն մի շարք կարևոր փաստաթղթեր՝ ԱՄՆ նախագահ Դոնալդ Թրամփի ներկայությամբ։ 

Ըստ նրա՝ հանդիպման արդյունքներով ՀՀ վարչապետն ու Ադրբեջանի նախագահը ստորագրելու են համատեղ հռչակագիր՝ ձևակերպելով խաղաղության հասնելու և հարաբերությունների լիարժեք կարգավորման հստակ ուղին, որն ԱՄՆ պաշտոնյաները բնութագրել են որպես «հնարավորինս անշրջելի»։ 

Ռաուֆօղլուն նաև գրել է, որ հանդիպման արդյունքներով նախաստորագրվելու է նաև Հայաստանի և Ադրբեջանի միջև համաձայնեցված խաղաղության համաձայնագրի տեքստը։ 

Ըստ նրա՝ ստորագրվելու է նաև համատեղ նամակ, որով կողմերը կհայտարարեն ԵԱՀԿ Մինսկի խմբից դուրս գալու մասին։ 

Ալեքս Ռաուֆօղլուն հայտնել է նաև, որ ԱՄՆ-ն առանձին փոխըմբռնման հուշագրեր կստորագրի Հայաստանի ու Ադրբեջանի հետ։