1 րոպեի ընթերցում
Արաբական Միացյալ Էմիրությունների նախագահ շեյխ Մուհամմադ բեն Զայեդ Ալ Նահյանը պաշտոնական այցով ժամանել է Ռուսաստան: «Արմենպրես»-ի փոխանցմամբ՝ այդ մասին հայտնել է ՏԱՍՍ-ի թղթակիցը:
Նրա ինքնաթիռը վայրէջք է կատարել մայրաքաղաքի «Վնուկովո-2» օդանավակայանում: Շեյխ Մուհամմադին ուղեկցում է ներկայացուցչական պատվիրակություն:
Ինչպես հայտնել են Կրեմլում, երկու երկրի ղեկավարները նախատեսում են քննարկել երկրների միջև բազմակողմանի համագործակցության վիճակը և հետագա զարգացման հեռանկարները, ինչպես նաև միջազգային օրակարգի արդիական հարցեր, այդ թվում՝ Մերձավոր Արևելքում ստեղծված իրավիճակը։
Ըստ ԱՄԷ-ի WAM լրատվական գործակալության հաղորդման՝ նախագահը մտադիր է Ռուսաստանի ղեկավարի հետ քննարկել երկկողմ համագործակցությունն առևտրի, ներդրումների և էներգետիկայի ոլորտներում: