Պատժամիջոցները ՌԴ-ին կստիպեն նստել բանակցությունների սեղանի շուրջ. ՆԱՏՕ-ում ԱՄՆ մշտական ներկայացուցիչ
1 րոպեի ընթերցում
ՆԱՏՕ-ում ԱՄՆ մշտական ներկայացուցիչ Մեթյու Ուիթաքերը կարծիք է հայտնել, որ ռուսական նավթի գնորդների համար երկրորդային պատժամիջոցներն «ակնհայտ քայլ» են ռուս-ուկրաինական հակամարտությանը վերջ դնելու համար։ «Արմենպրես»-ի փոխանցմամբ՝ այս մասին նա ասել է Bloomberg-ին տված հարցազրույցում։
«Անկասկած, մարտի դաշտում խնդրի լուծում չի կարող լինել, դիվանագիտական լուծումը միակն է։ Եվ նախագահ Թրամփը պայմաններ է ստեղծում այն բանի համար, որ Ռուսաստանը նստի բանակցությունների սեղանի շուրջ», - ասել է նա։
Ուիթաքերը նշել է, որ, իր կարծիքով, երկրորդային պատժամիջոցները, «որոնք կվերաբերեն նրանց, ովքեր, գնելով ռուսական նավթ, վճարում են այս պատերազմի համար (Չինաստան, Հնդկաստան, Բրազիլիա), ակնհայտ քայլ են այն դադարեցնելու համար»։
Օգոստոսի 8-ին լրանում է ԱՄՆ նախագահ Դոնալդ Թրամփի սահմանած վերջնաժամկետը, որից հետո ռուս-ուկրաինական հակամարտության կարգավորման քայլեր չձեռնարկելու դեպքում Ռուսաստանի դեմ կսահմանվեն պատժամիջոցներ, որոնք կազդեն նաև ՌԴ առևտրային գործընկերների վրա։ Թրամփը նշել է, սակայն, որ Ռուսաստանը շատ լավ է շրջանցում պատժամիջոցները։