2 րոպեի ընթերցում
Ընթացիկ տարվա օգոստոսից Հայաստանը կունենա իզոտոպային ստուգում իրականացնող լաբորատորիա։
«Արմենպրես»-ի հաղորդմամբ՝ ՀՀ կառավարության հուլիսի 31-ի նիստում այս մասին հայտնեց ՀՀ էկոնոմիկայի նախարար Գևորգ Պապոյանը՝ անդրադառնալով հայկական կոնյակի արտահանման հետ կապված խնդիրներին։
Նախարարի գնահատմամբ՝ լաբորատորիայի կարողությունները դեռ շատ համեստ են լինելու՝ 3-4 նմուշ օրական։
«Այս 34 տարվա մեջ մենք այս հարցը չէինք լուծել։ Այդ լաբորատորիան այժմ ունենք և կարողանալու ենք կոնյակի 3 հիմնական իզոտոպերը, որոնք ցույց են տալիս, որ դա խաղողի սպիրտից է արտադրված,ստուգել»,-ասաց Պապոյանը։
Նա կարևորեց լաբորատորիայի ստեղծումն ու դրա միջազգային հավատարմագրումը, որպեսզի լաբորատորիայի տված թուղթն այլ երկրներում նույնպես անցնի։ «Հետո պետք է հասկանանք, որ այդ պրոցեսը իրապես կարողանում ենք կառավարել, որովհետև եթե այդպես չենք կարողանում անել, բնականաբար, կառավարումը մեր ձեռքից բաց ենք թողնելու»,-ասաց նախարարը։
Փոխվարչապետ Մհեր Գրիգորյանի խոսքով՝ կոնյակի արտահանման հետ կապված խնդրից ամենաշատը տուժում են որակյալ արտադրանք ստեղծողները։
Նա ընդգծեց, որ պետք է շատ հոգատար լինել հայկական արտադրանքի վարկանիշի նկատմամբ, որովհետև մեկ անորակ խմբաքանակի պատմությունը դառնում է գնահատական ընդհանուր արտադրանքի մասին։
«Ես տեսել եմ դեպք, երբ հայկական կոնյակը արտադրվել է ոչ Հայաստանում և վաճառվում է։ Բնականաբար, այդ որակի գնահատման ազդեցությունը սկսում է տարածվել մեր արտադրանքի վրա։ Դա էլ է խնդիր, և պետք է մեխանիզմ գտնենք, թե ինչպես մոնիթորինգ անել»,-հավելեց փոխվարչապետը՝ հավելելով, որ նույնը վերաբերում է գյուղմթերքին, քանի որ իր տեղեկությամբ կան շուկաներ, որտեղ ոչ հայկական գյուղմթերքը վաճառվում է որպես հայկական։