Թրամփը հայտարարել է, որ 50 օրից ՌԴ-ի և Ուկրաինայի միջև համաձայնության բացակայության դեպքում «շատ վատ» կլինի
2 րոպեի ընթերցում
ԱՄՆ նախագահ Դոնալդ Թրամփը հայտարարել է, որ ռուս-ուկրաինական հակամարտության հարցում չի պաշտպանում կողմերից և ոչ մեկին և միայն ցանկանում է, որ արյունահեղությունը դադարի։ Թրամփի խոսքով՝ հակամարտության ավարտի համար իր սահմանած 50 օրվա ավարտից հետո հրադադարի բացակայության դեպքում Ռուսաստանի նկատմամբ կսահմանվեն պատժամիջոցներ և մաքսատուրքեր։
«Արմենպրես»-ի փոխանցմամբ՝ այս մասին նա ասել է լրագրողների հետ զրույցում, որի տեսանյութը տարածել է Forbes Breaking News-ը։
«Եթե 50 օրից համաձայնագիր չունենանք, ապա շատ վատ կլինի։ Մաքսատուրքեր կլինեն, ինչպես նաև այլ պատժամիջոցներ», - ասել է Թրամփը՝ ևս մեկ անգամ կրկնելով, որ հիասթափված է ՌԴ նախագահից։
Թրամփի նշել է, որ 50 օրը շատ երկար ժամանակահատված չէ, և որ Ռուսաստանի իշխանությունների դիրքորոշումն Ուկրաինայի հակամարտության վերաբերյալ կարող է փոխվել «շատ ավելի շուտ, քան 50 օրվա ընթացքում»։
Հուլիսի 14-ին Թրամփը հայտարարել էր, որ, եթե ռուս-ուկրաինական հակամարտության կարգավորման չհաջողվի հասնել 50 օրվա ընթացքում, ապա Միացյալ Նահանգները երկրորդային մաքսատուրքեր կսահմանի Ռուսաստանի նկատմամբ։ Ավելի ուշ Սպիտակ տանը պարզաբանել են, որ այդ միջոցներն, ամենայն հավանականությամբ, կվերաբերեն նավթին: