ՀՀ վարչապետն առաջարկում է հանրային–քաղաքական–հրապարակային դաշտում հայհոյախոսությունը և հիբրիդային թիրախավորումը դադարեցնել

Հայաստանի Հանրապետության վարչապետ Նիկոլ Փաշինյանն առաջարկում է հանրային–քաղաքական–հրապարակային դաշտում հայհոյախոսությունը եւ հիբրիդային թիրախավորումը դադարեցնել և անցնել բացառապես քաղաքակիրթ եւ հարգալից բանավեճի:

«Արմենպրես»-ի փոխանցմամբ՝ վարչապետն իր առաջարկի մասին գրել է «Ֆեյսբուք»-ի էջում՝ ընդգծելով, որ մինչև հուլիսի 5-ն արգելք է դնում իր կողմից «պարականոն» բառապաշարի եւ խոսույթի կիրառման վրա:

«Առաջարկում եմ հանրային կոնսենսուս ձեռքբերել, որ մի իքս ամսաթվից հանրային–քաղաքական–հրապարակային դաշտում հայհոյախոսությունը եւ հիբրիդային թիրախավորումը դադարեցնում ենք եւ անցնում բացառապես քաղաքակիրթ եւ հարգալից բանավեճի, եւ միայն ստուգված փաստերի վրա հիմնվելու տրամաբանությանը։

Ես առաջարկում եմ հուլիսի 1–ը որպես կոնսենսուսի մեկնարկի ամսաթիվ եւ այս պահից մինչեւ հուլիսի 5–ը վետո եմ դնում իմ կողմից «պարականոն» բառապաշարի եւ խոսույթի կիրառման վրա:

Հուլիսի 5–ին կկիսեմ իմ տպավորությունը, թե ինչ արձագանք է գտել առաջարկը հանրության եւ սոցիալական ցանցերի օգտատերերի շրջանում»,- գրել է ՀՀ վարչապետը: