Բացահայտվել է մեր պետության, անվտանգության և կայունության դեմ ուղղված հանցագործություն. Փաշինյան

Հայաստանի Հանրապետության իրավապահ համակարգը կանխել է պետականության, ազգային անվտանգության և կայունության դեմ ուղղված վտանգավոր հանցագործություն։ 

«Արմենպրես»-ի հաղորդմամբ՝ կառավարության նիստի ժամանակ այս մասին հայտարարեց վարչապետ Նիկոլ Փաշինյանը։ 

Նա բարձր գնահատեց ԱԱԾ-ի, Քննչական կոմիտեի, ոստիկանության, դատախազության և ՆԳՆ-ի աշխատակիցների համատեղ գործողությունները՝ նշելով, որ առաջարկելու է լավագույններին ներկայացնել պետական պարգևների։ 

«Կարևոր է արձանագրել, որ բացահայտվել է մեր պետականության, Հայաստանի անվտանգության և կայունության դեմ նախապատրաստվող հանցագործություն։ Բնականաբար, նաև կանխվել է այդ պլանի իրագործումը։ Շնորհակալություն եմ հայտնում մեր իրավապահ համակարգի բոլոր ներկայացուցիչներին»,- նշեց  վարչապետը։

Նա հավելեց, որ առավոտյան հարցը քննարկել է ՀՀ նախագահի հետ։ 

Միաժամանակ Փաշինյանն անդրադարձավ հանրային արձագանքներին, որոնցում համեմատություններ կան նշված դեպքի ու Հոկտեմբերի 27-ի ահաբեկչության միջև։ 

«Օգտատերերի մի խումբ արձանագրում է, որ Հայաստանում նոր Հոկտեմբերի 27 է կանխվել։ Մի ուրիշ խումբ էլ հարց էր բարձրացնում՝ արդյոք 1999 թվականին Հայաստանի Հանրապետության իրավապահ մարմինը կարո՞ղ էր կանխել Հոկտեմբերի 27-ի ահաբեկչությունը։ Կարծում եմ՝ սա մի հարց է, որի պատասխանը նույնպես պետք է վստահելի ձևով ձևակերպել։ Հույս ունեմ, որ մեր իրավապահ համակարգը այս հարցի պատասխանը գտնելու ուղղությամբ նույնպես ջանքեր կգործադրի»,- եզրափակեց վարչապետը։

ՀՀ քննչական կոմիտեն հաղորդագրություն էր տարածել, ըստ որի՝ Վազգեն Գալստանյանի (Տեր Բագրատ արքեպիսկոպոս Գալստանյան) ղեկավարած «Սրբազան պայքար» շարժման շրջանակում նախապատրաստվել են ահաբեկչական գործողություններ և փորձ՝ ՀՀ իշխանության յուրացման նպատակով։ Հաղորդագրության համաձայն՝ շարժման ներսում ձևավորվել էին մինչև 250 հարվածային խմբեր, հիմնականում՝ նախկին զինվորականներից և ոստիկաններից, որոնց նպատակն էր միաժամանակյա կործանիչ գործողությունների միջոցով կաթվածահար անել երկրի կառավարման և տրանսպորտային համակարգը։ Հանցավոր խմբի ծրագրերում ընդգրկված էին՝ տրանսպորտային միջանցքների արգելափակում, էլեկտրամատակարարման և ինտերնետի անջատում, պայթյունների և կրակոցների միջոցով վախի մթնոլորտ ստեղծում, պետական համակարգերի դեմ կիբեռհարձակումներ, ոստիկանության շարժի խափանում և հանրային իշխանության կազմալուծում։

ՔԿ տվյալներով՝ խմբի անդամներն արդեն իսկ ձեռք են բերել հազարավոր հրավտանգ միջոցներ, մետաղական «աստղիկներ» և քարտեզներ՝ գործողությունները համակարգելու համար։ Որպես կենտրոնական կազմակերպիչ հանդես է եկել Վազգեն Գալստանյանը։

Վազգեն Գալստանյանը կալանավորվել է 2 ամսով։ Նրան մեղադրանք է առաջադրվել ՀՀ քրեական օրենսգրքի երեք հոդվածներով՝ ահաբեկչության, զանգվածային անկարգությունների, իշխանության յուրացման նախապատրաստում։ 

Բագրատ սրբազանը մեղադրանքները չի ընդունում և դրանք համարում է քաղաքական հետապնդում։

Քննչական կոմիտեն դատարան է ներկայացրել ընդհանուր առմամբ 16 անձի կալանավորման միջնորդություն։ Նրանցից 9-ի մասով դատարանը բավարարել է կալանքի միջնորդությունը, մեկի վերաբերյալ որոշումը կհրապարակվի հունիսի 26-ին։ Մնացածների հարցերը նույնպես կքննվեն նույն օրը։