1 րոպեի ընթերցում
Ռուսաստանը պատրաստ է անհրաժեշտության դեպքում տրամադրել իր միջնորդական ծառայություններն իրանաիսրայելական հակամարտության կարգավորման գործում, ճեպազրույցի ժամանակ հայտարարել է ՌԴ նախագահի մամուլի քարտուղար Դմիտրի Պեսկովը։ «Արմենպրես»-ի փոխանցմամբ՝ այս մասին հաղորդում է ՏԱՍՍ գործակալությունը:
Նա հիշեցրել է, որ անցած օրերին Ռուսաստանի ղեկավար Վլադիմիր Պուտինը բանակցություններ է վարել Իսրայելի վարչապետ Բենիամին Նեթանյահուի, Իրանի նախագահ Մասուդ Փեզեշքիանի և ԱՄՆ նախագահ Դոնալդ Թրամփի հետ։
«Ռուսաստանը շարունակում է պատրաստ լինել անհրաժեշտության դեպքում տրամադրելու իր միջնորդական ծառայությունները, այդ թվում՝ սեղանին են մնում այն առաջարկությունները, որոնք նախկինում շարադրվել են նախագահ Պուտինի կողմից նախագահ Թրամփի հետ նախորդ զրույցի ժամանակ։ Այդ առումով Ռուսաստանի պատրաստակամությունն ու ցանկությունը մնում են։ Եվ անհրաժեշտության դեպքում այդ ամենը կարող է իրականացվել», - ասել է Կրեմլի ներկայացուցիչը։
Նա նաև նշել է, որ Ռուսաստանը պատրաստ է անել ամեն ինչ՝ Մերձավոր Արևելքում ճգնաժամի սկզբնապատճառների վերացման համար և կապի մեջ է Իրանի և Իսրայելի հետ: