Ռուսաստանը կցանկանար ընդլայնել ԵԱՏՄ-ն. Ալեքսեյ Օվերչուկ

Ռուսաստանի Դաշնության փոխվարչապետ Ալեքսեյ Օվերչուկը հայտարարել է, որ Մոսկվան կցանկանար ընդլայնել Եվրասիական տնտեսական միությունը՝ նախևառաջ ներառելով այն երկրները, որտեղից գալիս են ամենամեծ թվով միգրանտներ՝ աշխատանքային միգրացիայի սահմանափակումների բացակայության պատճառով։

«Արմենպրես»-ի հաղորդմամբ՝ այս մասին հայտնում է «ՌԻԱ Նովոստի»-ն՝ մեջբերելով ՌԴ փոխվարչապետի հայտարարությունը «Ռոսիյսկայա գազետա»-ին տված հարցազրույցից։

«Ժողովրդագրական իրավիճակն, աշխատուժի պահանջարկը և դրա արժեքը այնպիսին են, որ տնտեսությունը զարգացնելու և գնաճը զսպելու համար անհրաժեշտ է ներգրավել աշխատանքային միգրանտների», - ասել է Օվերչուկը։

Վերջինս հստակեցրել է, որ խնդրի մի մասը կարող է լուծվել առաջադեմ տեխնոլոգիաների ներդրման և արտադրողականության բարձրացման միջոցով, սակայն դա երկարաժամկետ լուծում է, որը պահանջում է ներդրումներ, ինչը հատկապես թանկ է այսօր։

«ԵԱՏՄ օրենքը նպաստում է երկրների միջև աշխատուժի տեղաշարժի հետ կապված լարվածության որոշակի մեղմացմանը։ Այն թույլ է տալիս իրենց երկրներից դուրս աշխատող՝ Հայաստանի, Բելառուսի, Ղազախստանի, Ղրղզստանի և Ռուսաստանի քաղաքացիներին օգտվել նույն իրավունքներից, ինչ այն երկրի քաղաքացիները, որտեղ նրանք աշխատում են»,-շեշտել է ՌԴ փոխվարչապետը։ 

Օվերչուկը մատնանշել է, որ ԵԱՏՄ անդամ պետությունների քաղաքացիների նկատմամբ վերաբերմունքի տարբերությունների բացակայությունը ստեղծում է ավելի լավ պայմաններ այդ մարդկանց մեր հասարակություն ինտեգրման համար, ազդում է նրանց կյանքի որակի վրա, նրանց վստահ է դարձնում իրենց իրավունքների նկատմամբ, ավելի քիչ կախված է սփյուռքից և մեծապես խոչընդոտում է աշխատանքային միգրացիայի հետ կապված հանցագործությանը։ 

«Սա մեծապես բացատրում է, թե ինչու մենք կցանկանայինք ընդլայնել ԵԱՏՄ-ն այն երկրների հաշվին, որոնք մեզ ուղարկում են ամենամեծ թվով աշխատանքային միգրանտներ», - բացատրել է Ալեքսեյ Օվերչուկը։