2 րոպեի ընթերցում
Իրանի արտաքին գործերի նախարարի տեղակալ Սայիդ Խաթիբզադեն հայտարարել է, որ մինչ այս պահը Թեհրանի և Վաշինգտոնի միջև միջուկային ծրագրի շուրջ բանակցությունները լավ են ընթացել:
‹‹Արմենպրես››-ի հաղորդմամբ՝ այս մասին իրանցի դիվանագետը հայտարարել է «Երևանյան երկխոսություն–2025» միջազգային համաժողովի շրջանակում լրագրողների հետ ճեպազրույցի ընթացքում:
‹‹Չեմ ցանկանում առաջ ընկնել և դատողություն անել, բայց կարող եմ ասել, որ մինչև այս պահը բանակցությունները լավ են ընթացել››,-նշել է Իրանի ԱԳ նախարարի տեղակալը:
Ավելի վաղ Միացյալ Նահանգների նախագահ Դոնալդ Թրամփը հայտարարել էր Իրանի հետ բանակցություններում դրական առաջընթացի մասին, իսկ Իրանի նախագահ Մասուդ Փեզեշքիանն, անդրադառնալով Իրան-ԱՄՆ անուղղակի բանակցություններին, հայտնել էր, որ Թեհրանը կարող է գտնել խնդիրների լուծման ուղիներ, նույնիսկ առանց գործող պատժամիջոցների վերացմանն ուղղված բանակցությունների։
Միացյալ Նահանգները և Իրանը Օմանի միջնորդությամբ անցկացրել են բանակցությունների չորս փուլ՝ Թեհրանի միջուկային ծրագրի շուրջ տարաձայնությունները լուծելու նպատակով։ Դրանցից առաջինը տեղի է ունեցել ապրիլի 12-ին՝ Օմանի մայրաքաղաք Մասկատում, երկրորդն՝ ապրիլի 19-ին Հռոմում, երրորդը և չորրորդն՝ ապրիլի 26-ին և մայիսի 11-ին՝ կրկին Օմանի մայրաքաղաքում, իսկ հինգերորդ հանդիպումը՝ մայիսի 23-ին՝ Հռոմում։
Խորհրդակցություններին Իրանի պատվիրակությունը գլխավորել է արտգործնախարար Աբբաս Արաղչին, իսկ ամերիկյան պատվիրակությունը՝ նախագահի հատուկ դեսպանորդ Սթիվեն Ուիթքոֆը։