1 րոպեի ընթերցում
Մոսկվան շահագրգռված է Երևանի և Բաքվի միջև հարաբերությունների ամբողջական կարգավորմամբ։
«Արմենպրես»-ի փոխանցմամբ՝ ինչպես հաղորդում է «Սպունիկ Արմենիա»-ն, Երևանում Հայաստանի արտաքին գործերի նախարար Արարատ Միրզոյանի հետ հանդիպման ժամանակ այս մասին հայտարարել է Ռուսաստանի արտաքին գործերի նախարար Սերգեյ Լավրովը։
Լավրովի խոսքով՝ Ռուսաստանն անկեղծորեն ձգտում է հայ-ադրբեջանական հարաբերությունների կարգավորմանը՝ դրա համար որպես որակյալ հիմք դիտարկելով Հայաստանի, Ռուսաստանի և Ադրբեջանի ղեկավարների եռակողմ պայմանավորվածությունները։
«Դուք միշտ կարող եք հույս դնել մեր աջակցության վրա ինչպես կոմունիկացիաների հաղորդակցության, այնպես էլ հայ-ադրբեջանական սահմանի դելիմիտացիայի և հումանիտար խնդիրների լուծման հարցում՝ հաշվի առնելով բոլոր կողմերի շահերը»,- ընդգծել է ՌԴ ԱԳ նախարարը։
Նա հավելել է, որ Մոսկվան տարածաշրջանային համագործակցության 3+3 հարթակի զարգացման նշանակալի ներուժ է տեսնում, որը միավորում է Հարավային Կովկասի երկրներին և նրանց մոտիկ հարևաններին։