3 րոպեի ընթերցում
Ռուսաստանի Դաշնության արտաքին գործերի նախարար Սերգեյ Լավրովը մայիսի 20-21-ն աշխատանքային այցով գտնվելու է Հայաստանում։
«Արմենպրեսի»-ի հաղորդմամբ՝ այս մասին նշված է ՌԴ ԱԳ նախարարության տարածած մամուլի հաղորդագրության մեջ։
Նշվում է, որ այցի շրջանակներում Սերգեյ Լավրովը հանդիպում կունենա իր հայ գործընկերոջ՝ Հայաստանի ԱԳ նախարար Արարատ Միրզոյանի հետ, նախատեսված են հանդիպումներ նաև Հայաստանի վարչապետ Նիկոլ Փաշինյանի և նախագահ Վահագն Խաչատուրյանի հետ։
«Կոնտակտները տեղի կունենան 2024 թվականի հոկտեմբերի 8-ին ամենաբարձր մակարդակով ձեռք բերված պայմանավորվածությունների մշակման, ինչպես նաև Արարատ Միրզոյանի՝ հունվարի 21-ին Մոսկվա այցի ժամանակ ձեռք բերված պայմանավորվածությունների շրջանակներում»,-նշված է հաղորդագրության մեջ։
ՌԴ ԱԳՆ-ի փոխանցմամբ՝ հանդիպման օրակարգում ներառված են երկկողմ համագործակցության լայն շրջանակի հարցեր, եվրասիական ինտեգրացիոն միավորումների շրջանակներում փոխգործակցությունը, ինչպես նաև միջազգային հարթակներում, հիմնականում՝ ՄԱԿ-ում, դիրքորոշումների համաձայնեցումը։ Բացի այդ, արտաքին քաղաքական գերատեսչությունների ղեկավարները մտքեր կփոխանակեն տարածաշրջանային անվտանգության հարցերի, այդ թվում՝ հայ-ադրբեջանական և հայ-թուրքական հարաբերությունների կարգավորման գործընթացների հեռանկարների վերաբերյալ։
«Նախատեսվում է 2025-2026 թվականների միջգերատեսչական խորհրդակցությունների պլանի ստորագրում»,-ասված է ՌԴ ԱԳՆ հաղորդագրության մեջ։
Հաղորդվում է, որ Սերգեյ Լավրովը ելույթ կունենա Հայ-ռուսական համալսարանում Ռուսաստանի համալսարանների մասնաճյուղերի դասախոսների և ուսանողների, ինչպես նաև փորձագիտական հանրության առջև, ինչպես նաև կհանդիպի հայրենակիցների հետ Ռուսական տանը։
«Ավանդույթի համաձայն՝ ծաղիկներ կզետեղվեն Անհայտ զինվորի գերեզմանի անմար կրակի մոտ և ծաղկեպսակ կտեղադրվի Հայոց ցեղասպանության զոհերի հուշարձանին»,-նշված է տարածված հաղորդագրության մեջ։
Մոսկվան հույս ունի, որ այցը կնպաստի Ռուսաստանի և Հայաստանի միջև քաղաքական և միջգերատեսչական երկխոսության ամրապնդմանը, կհանգեցնի փոխըմբռնման աճի և երկու կողմերի համար հետաքրքրություն ներկայացնող հարցերի փոխադարձաբար ընդունելի լուծումների որոնմանը։