Պատգամավորն առաջարկում է պարտադիր զինվորական ծառայության սահմանային տարիքը ներկայիս 27-ի փոխարեն դարձնել 37 տարի
2 րոպեի ընթերցում
ՀՀ պետական սահմանի Տավուշի ուղղությամբ տեղակայված մարտական դիրքերում
Ազգային ժողովի «Քաղաքացիական պայմանագիր» խմբակցության պատգամավոր Հայկ Սարգսյանը հանդես է եկել նախաձեռնությամբ՝ շրջանառության մեջ դնելով մի շարք օրենքներում փոփոխություններ նախատեսող փաթեթ, որի նպատակն է արդյունավետորեն պայքարել պարտադիր զինվորական ծառայությունից խուսափելու տարածված երևույթի դեմ։
«Արմենպրես»-ի հաղորդմամբ՝ պատգամավորը առաջարկում է պարտադիր զինվորական ծառայության սահմանային տարիքը ներկայիս 27-ի փոխարեն դարձնել 37 տարի։
«Մինչև 18 տարեկան արական սեռի քաղաքացիների համար ՀՀ քաղաքացիությունից հրաժարվելու դեպքում սահմանել 15 միլիոն դրամ բազային տուրք, որը համարժեք է այն գումարին, որը ներկայումս 27 տարին լրացած և ծառայությունից խուսափած քաղաքացիները վճարում են՝ քրեական պատասխանատվությունից խուսափելու համար։ Քրեականացնել բժշկական փորձաքննությունից կամ նմուշների ներկայացումից հրաժարվելը, երբ դա արվում է զինվորական ծառայությունից խուսափելու նպատակով։ Այսինքն, այն քաղաքացիները, որոնք պարտադիր զինվորական ծառայությունից կամ հերթական զորակոչից կամ զորահավաքից խուսափում են առողջական խնդիրներով պայմանավորված և հրաժարվում են փորձանմուշ տալուց կամ որևէ կերպ խոչընդոտում են, առաջարկում եմ դա նույնպես քրեականացնել, որպեսզի նման դեպքերը նույնպես հնարավորինս քիչ լինեն»,- ընդգծեց Սարգսյանը։
Բացի այդ, պատգամավորն առաջարկում է կառավարության որոշումների փոփոխմամբ որոշ առողջական խնդիրների դեպքում նախատեսել ծառայության սահմանափակումներով զորակոչ, այլ ոչ թե լիարժեք ազատում։